Plie pyrda ka Uplifter Alternative ia ka jingdap 25 snem da kaba pynlong ia ka Cricket Tournament 2023

Syllad | The Rising MeghalayaOctober 25, 2023

Ka Uplifter Alternative ka la plie pyrda ia ka jingdap 25 snem ka seng naduh bala seng ia ka ha u snem 1998 da kaba pynlong ia ka “1st 2-Day Khasi Tennis Ball Cricket Tournament 2023” ha Madan Nongthymmai, Jingkieng, Shillong.

La plie pyrda ia kane ka tournament da u Bah Bawan Khyriem President jong ka Nongthymmai Sports & Cultural Club ha ka 21 tarik mynta u bnai Risaw 2023 kum u kongsan ryngkat ka jingiadon ryngkat u Bah Nangsan Pakyntein, Rangbah Shnong, Dorbar Shnong Lumsohphoh, ki nongkitkam ka sports club bad ki dkhot ka seng.

Ha kane ka sngi plie la pynlong da ka jingialehkai kriket kaba la iakhun hapdeng ka Rngi Rum pyrshah ia ka Senglang ha kaba ka Senglang kala pynliem noh  da 147 run.

Ha ka sngi kaba kut, ka jingialehkai phainal kala long hapdeng ka Nongkhyriem pyrshah ia ka Lumshyiap bad ka jingiakhun kala long kaba da itynnad shisha ha kaba ka Lumshyiap kaba la kam ban tied nyngkong kala ioh ban tied tang 45 run bad liem noh baroh ki wicket.

U Jerry u la lah ban kamai 10 run bad u Steve u lah kamai 9 run. U Kidlee Nongkhlaw jong ka kynhun Nongkhyriem u lah ioh ban khur haduh 5 wicket.

Haba dei sa ka pali ban tied na ka kynhun Nongkhyriem, kane ka kynhun kam shym lah ban tied tam ia ka Lumshyiap hynrei ha ka la lah ban tied tang 43 run bad lut noh ki 8 over kaba la mang sha ka bad hap artad 8 wicket.

U Donkupar ula ban tied haduh 21 run na ka bynta ka kynhun ka jong u. Da kane ka jingkawang bol bha ka Lumshyiap ka la pynlong ia ka kynhun ban jop da 2 run ia ka Nongkhyriem.

Ka Lumshyiap kaba long ka lahduh kala ioh ban khur ia ka song pisa kaba T.12,000   bad ka kynhun Nongkhyriem kala ioh ban khur ia ka song tyngka kaba T. 6000/-. Ha kane ka tournament, ki team baroh ba la iashim bynta ki long 14 tylli. 

Na ka liang ka seng ha u kyrwoh lyngba u Bah JC Cajee, Chairman  ka pyntip ruh ban kan sa pynkhie im biang ia ka Uplifter Open to All Tennis Ball Cricket League kaba ju pynlong ha ki por mynshua bad kumjuh ruh kan sa pynlong ia ka Tournament Football, Basketball bad kiwei kiwei ki prokram ha kine ki bnai ki ban sa wan.