Plie paidbah u Wailadmiki Shylla iaka E-Cell ka Thomas Jones Synod College

Syllad | The Rising MeghalayaMay 14, 2025

U MLA ka Jowai, Ma Wailadmiki Shylla, haka 13 tarik Jymmang u la plie paidbah ia ka Entrepreneurship Cell (E-Cell) jong ka Thomas Jones Synod College, Jowai haka jingialang kaba long ha hall jong ka kolej.

Ha kane ka juh ka sngi la pynlong ruh iaka jinghikai pynsnewthuh halor ka jingseng kam seng jam ne entrepreneurship awareness program.

Ha ka jingkren lamphang jong ka, ka Principal ka kolej, ka Dr. I Dkhar, ka la ong ba ka thong jong kane ka E-Cell ka long ban thaw ia ka rukom pyrkhat kaba thymmai ban kyntiew ia ka kam seng kam seng jam hapoh ka rilum Jaintia, khamtam eh hapdeng ki samla pule. Kane ka Cell kan iarap ruh ban pynkylla ia ki jingmut jingpyrkhat jong ki samla sha ki kam khaii bad ban pynshlur ia ki ban shim ia ka kam seng kam kum kawei na ki lad kamai jakpoh ba shngain.

Ki jingthmu jong ka E-Cell ki kynthup:

Ban thaw ia ka rukom im kaba kyntiew ia ka kam sengkam

Ban pynshlur ia ka mynsiem sengkam ha ki samla

Ban iarap ban pynkylla ia ki jingmut sha ki kam khaii pateng.

Ban peit ia ka kam sengkam kum ka lad jingtrei kaba paka

U Ma Wailadmiki Shylla, haba ai jingkren kum u kongsan, u la ong, “Nga ai ka jingiaroh ia kane ka sienjam jong ka kolej. Ha ka por ba ki samla ki mad ia ka jingkyrduh kam kyrduh jam, kum kine ki lad ki long kaba donkam eh. Ha ka jingialam jong u Myntri Rangbah ka jylla u Conrad K. Sangma, uba don ruh ka kyrdan pule ha ka kam sengkam seng jam, ka sorkar ka la pyrshang ban thaw ia ki lad ki lynti ban kyntiew ia ka kam sengkam. Kam lah satia ba ka sorkar kan ai kam sorkar ia man la uwei pa uwei, hynrei dei ban kyntiew ia ka jinglah jong ki samla ban long ki nongpynmih kam.”

U Bah Nathaniel Kharkongor, Senior Manager ka EPDP, PRIME Meghalaya, haba ai jingkren kum u riewshemphang, u la ong ba lyngba kane ka E-Cell, ki samla kin sa lah ban kylla long ki nongpynmih kam ban iarap ruh ia kiwei. U la ong ba ban long u nongpynmih kam uba jop, dei ban long kiba iohi jngai, ban ithuh ia ki jingeh bad ban wad lynti ban weng ia ki.

Ka jingplie paidbah ia ka E-Cell ha kane ka kolej ka dei ka sienjam ba kongsan ban kyntiew ia ki samla ka Jaintia Hills ha ka lynti sengkam sengjam.