Plie paidbah u Nidamon Chullet iaka football 6-Aside ka primary unit ka NPP ha Mission Compound

Syllad | The Rising MeghalayaAugust 29, 2025

Ka NPP Primary Unit Mission Compound, Jowai haka 28 tarik Nailar kala pynlong iaka lympung ialehkai kaba tip kum ka 6-Aside Football Tournament ha madan Biar Skur Jowai.

Ia kane ka lympung ialehkai la wan ban plie iaka da u Working president ka NPP West Jaintia Hills District Ma Nidamon Chullet kum u kongsan. Edystone Shylla kum u symbud kongsan, u Waheh Shnong ka Lion Mission Compound Ma DH Synrem nalor kiwei kiwei.

Haba pyniaid iaka jingialang u Chairman Ma Donkupar Synkrem ula pyntip ba la don 26 tylli ki kynhun ialehkai kiba la iashim bynta bad ka jingthmu ka long ban wanrah ka jingiaithuh ithaw bad ka jingiatylli hapdeng ki samla hapoh ka 2-Jowai Constituency.

U Ma Nidamon Chullet haka jingkren ula iaroh iaki nongialam ka NPP Primary Unit Mission Compound, Jowai halor ka jinglah ban pynlong ia kaba kum kane ka lympung ialehkai kaba long ka jingmyntoi iaki khun samla kiba don ka sap ialehkai.

Haba pynpaw halor ka jingkongsan jong ka jingialehkai sports, u Ma Chullet ula ong ymtang ba ka long ka bynta jong ka koit ka khiah bad ka lad ioh kam ioh jam, hynrei ba ka long ruh kum kawei ka shlem hikai ba ki samla kin lait na ki jingdih ba sniew.

U Ma Chullet ula kyntu ruh iaki samla ban trei shitom namar ka jingialehkai phutbol ha kine ki sngi kadei ka karkhana kaba lah ban ai kam aijam iaki samla ba kin ieng hala ki kjat.

Iaka jingialang la pynwai da ki kyntien khublei na u President NPP Primary Unit Mission Compound Jowai, Ma Heipormi Dhar.

Haba phai shaka jingialehkai ha ka sngi sdang ia akne ka football, ka Loomkyrwiang kala jop kput haduh da 9-1 pyrshah iaka Mynthong-B.