Plie paidbah u Lahkmen iaka iingskul thymmai ka Demthring Wahthang Govt LPS kaba tei haka dor T.43 lak

Syllad | The Rising MeghalayaMay 6, 2025

U MLA ka thain Ma Lahkmen Rymbui haka 5 tarik Jymmang ula plie iaka iingskul bathymmai jong ka skul Demthring Wahthang Government Lower Primary School, West Jaintia Hills District.

Ia kane ka skul la tei thymmai haka jinglut kaba shongdor T.43 lak tam tyngka lyngba ka State Mission Education Phase-II jong u snem 2023-2024.

Ka Demthring Wahthang Government Lower Primary School dei kaba la seng naduh u snem 1973.

U Ma Lahkmen Rymbui haka jingkren ula ong ka jingtei ia kane ka skul kam ym urlong long lada ym ioh iaka Sorkar kaba kitkhia, da kaba u aikhublei ruh ia u Myntri rangbah ka Jylla u Conrad K Sangma ba hapoh ka jingialam jong u, ka Sorkar na kawei ka snem sha kawei ka la pyrshang ban peit bniah na ka bynta ban kyntiew iaka pule puthi hapoh ka Jylla.

‘Ki briew ki lah ban bein ban kynnoh iaka Sorkar hynrei kim iohi pat ba kane ka Sorkar ka peit naka bynta ki jingdonkam jong ka jylla la ka long haki skul, ki jingmyntoi jong ki khynnah skul, ka surok, ki lynti synkieng, ki jaka sumar bad ki liang baroh, la ong u Ma Lahkmen.

U pynpaw ruh ka jingsngewnguh iaka Sorkar Jylla halor ka jingkyntiew kyrdan iaka Nongtalang Government Secondary School sha ka Higher Secondary School bad ka jingsdang iaka lain pule Commerce hapoh Sohkha Government Higher Secondary School.

Ula iathuh ruh iaka jingangnud jong u ban kyntiew kyrdan iaka RMSA kaba don haka shnong Shkenpyrsit bad Mustem shaka Higher Secondary School.

U Ma Lahkmen u kyrmen ba kane ka skul ba thymmai kan long ka sharak iaki khynnah skul kane ka shnong ban ioh iaka jingnang jingstad bad ka jinghikai ryngkat ka akor ka burom naka bynta ban saindur iaka lawei kaba phyrnai jong ki khynnah.

Na ka liang ki nongialam shnong khamtam ki nonghikai bad khynnah skul ki pynpaw iaka jingkmen kaba khraw ba kila ioh iaka iing skul kaba thymmai bad kaba skhem, bad ki la iathuh ruh ba ki khynnah skul bad ki nonghikai ki mad ia shibun ki jingeh haki snem bala leit noh namar bala rim ka skul bad hap ruh ban shong klas hapdeng ka um bad ka ktieh haka por slap.

Iaka jingialang la pyniaid da u Chairman Ma MS. Ryngkhlem bad la ioh ka jingkren na u dkhot ka SMC Ma SB Ryngkhlem bad Ma LC Ryngkhlem nalor kiwei bad la pynphuh pynphieng iaka jingialang da ki jingrwai jingshad na ki khynnah kane ka skul.