Plie paidbah ïaka kynroh ba shna na ka skim bylla 100 sngi ha Moolang

Syllad | The Rising MeghalayaMarch 31, 2021

Ka Kong DM Suja, Project Director, District Rural Development Agency (DRDA), East Jaintia Hills District ka la plie paidbah ïaka Retaining Wall ba la shna lyngba skhim bylla 100 sngi ne ka Mahatma Gandhi National Rural Employment Guarantee Scheme (MGNREGS).

Ïaka jingïalang plie paidbah la pynpaw da u Waheh shnong ka Moolang u Bah Kwen Shylla haka jingdon lang u BDO u Tammiyaki Shylla, u G Pdang Gram Sevak bad kiwei kiwei.

La ïoh ka jingkren na u Pdianghun Dkhar Waheh Shnong barim uba la ong ba dei lyngba kane ka skhim ba ka shnong ka ïoh ïaki kam pynroi naduh ki lynti ïaid kjat bad kiwei kiwei bad u kyrmen skhem ba lyngba katei ka skhim yn sa lah ban shna ïaki tyllong umbam umdih khnang ban myntoi ki nongshong shnong.

U Rev. S Siangshai haka jingkren ula kyntu ïaki nongshong shnong ban shimkhia bad sumar ïa kino kino ki jingmyntoi ba wan lyngba ka sorkar khnang ban myntoi hadien habud.

U Bah Piwel Shylla ula iaroh iaki Waheh Shnong barim ba ki la wanrah shibun ki skhim pynroi hapoh Shnong pohthaw. Ula ong lada ki shnong nongkyndong ki sahdien ka ri bad jaitbynriew ruh ka sahdien.

U Dr Tammiyaki Shylla, BDO Khliehriat haka jingkren ula pynpaw ka jingkmen ba ka shnong ka la pyntrei hok ïaka skhim bad ula kyntu iaki nongïalam kumjuh ki nongshong shnong ban ïatreilang ryngkat ryngkat bad ki tnad treikam sorkar khnang ban lah shuh shuh ban wanrah ïaki skhim pynroi.

Ka kongsan ka Kong DM Suja ka la ong, ka skhim MGNREGS ka ïarap shibun ïaki paidbah khamtam ïaki thaiñ nongkyndong bad ka ai kam ai jam ruh ïaki nongshong shnong.

Ka bor Shnong ka la pynkup burom ïaka Kong Jelry Rymbai ba ka la ai sngewbha ïaka jaka sha ka Shnong ban ïoh pynshna ïaka Retaining wall, kaba la long artad kum ka lynti iaid kjat.