Plie ka Sorkar Meghalaya ia ka jingkhang na ka bynta ki nurse ban leit trei sha Germany

Syllad | The Rising MeghalayaMay 23, 2025

Hadien ka sienjam kaba jop ha kaba phah ia ki nurse na kane ka jylla ban leit trei sha Japan bad Singapore, mynta ka Germany ka la kylla long kawei pat ka jaka kaba bud kaba tyrwa ia ka rynsan ha ka pyrthei na ka bynta ki Nurse bad ki nongtrei ka koit ka khiah na kane ka jylla.

Kane ka la wan long hadien ba u Myntri Rangbah ka Jylla u Conrad K Sangma haka 22 tarik Jymmang u la plie ia ka prokram aijinghikai ia ka ktien German ha ka jingialang kaba la long ha Shillong Tech Park.

“Kaei kaba ngi leh mynta ka sngi hangne ka long ban pynkylla ia ki jingeh sha ka kabu kaba khraw. Ka Meghalaya ka dei kaba don ia ki nongshong shnong kiba dei ki khynnah samla hapoh ka ri, bad ngi pynlong ia kane ka kabu sha ka bor ha ka pyrthei. Wat lada ngi phah haduh 30,000 ngut ki riew shemphang shabar jong ka ri, ka jingphah pisa ka jong ki kan kot sha ka T.250 klur shi bnai, kata T.3000 klur shi snem sha kiba haiing hasem,” ong u Myntri Rangbah.

U Myntri u la kular ruh ia ka jingkyrshan kaba pura na ka jylla, kynthup ia ka jingiarap pisa na ka bynta ki jingai jinghikai bad ban tei ia ka jingshaniah na ka bynta ban leit trei shabar jong ka ri da kaba ong, “Ki kmie ki kpa ha ki por kiba la dep ki don ia ka jingartatien namar ka jingsngewkhia halor ki jinglut jingsep bad ka jingshngain. Mynta ka sorkar ka ieng kum ka nongbahkhlieh. Ngi don hangne ban pynthikna ba ki khun ki kti jong phi ki don ha ka jingshngain, ka jingbtin lynti bad ka jingpynioh ia ka kabu kaba khraw.”

Na ka liang u Conrad u la kular ruh ba da lade hi un leit ban synran lang ia ka kynhun kaba nyngkong na kito kiba la shah jied ban leit sha Germany.

U la bynrap ruh ba kane ka jingiatreilang kan pynkhlain ia ka jingiadei hapdeng ka India bad ka Germany bad ka long kaba sngewkmen shibun ba ka Meghalaya lyngba ka kynhun nongtrei jong ki samla kan lah ban long shibynta jong kata ka khana jingkiew shaphang bad ka jingjop.

“Ka Germany ka la sakhi ia ka jingduna ki nongtrei ha ka koit ka khiah. Hapoh u 2035, ngin donkam sa 7 million ki nongtrei kiba tbit. Kane ka prokram mynta ka sngi ka pynpaw ia ka jingiaid lynti kaba pynkylla ia ka jingim, kine ki samla ym tang ba kin leit trei sha Germany, hynrei ruh ba kin trei shitom, kin noh synniang bad kiew shaphrang,” ong ka Andrea Jeske, Deputy Consul General kaba mihkhmat ia ka German Consulate Kolkata haba pynpaw ia ka jingkyrmen halor kane ka jingiatreilang.

Nalor kata ka la kren ruh halor ki polisi bathymmai ka Germany ha kaba iadei bad ka jingwan buhai shnong kum ka Opportunity Card bad ka Skilled Immigration Act, kaba plie ia ki lad ki lynti kiba kham pynsuk na ka bynta ki nongtrei ki bym dei na European Union.

Katba na ka liang u Jan Eben, Country Director General of People to Help Germany, u la pynpaw ia ka jingtreikam ba pura jng ka prokram bad ong ba kane ka jingiatreilang kam dei satia tang ha ka liang ka ioh kam ioh jam hynrei na ka bynta ban tei ia ka jingim.

U la ong ruh, “Ngi kyrshan ia ki kyrtong naduh ki jingai jinghikai haduh ka jingpyniasoh. Naduh ka jinghikai ia ka ktien bad ka kolshor haduh ka jingiakynduh ia phi hapoh ka kad liengsuin ha Germany, phin ym long marwei ha kane ka jingiaid lynti ka jong phi.”