Plie ka Santa Mary Shylla iaka madan futsal ha Saipung; pyrto ia ki sienjam ka sorkar ban kyntiew ia ka sports

Syllad | The Rising MeghalayaMay 23, 2025

Ka MLA ka Sutnga-Saipung ka Kong Santa Mary Shylla haka 22 tarik Jymmang ka la plie paidbah ia ka madan futsal ba la bei tyngka lyngba ka District Mineral Foundation (DMF) Fund ha ka shnong Saipung, East Jaintia Hills.

Haba kren ha ka jingialang, ka MLA ka la pyrto halor ki sienjam ba la shim da ka sorkar bad ki bor pyniaid ka District ban kyntiew ia ki sports lyngba ka jingbei tyngka ban tei ia ki jaka ialehkai lem bad kiwei pat ki sienjam. Ka la kyntu ruh ban pyndonkam hok ia kane ka madan ialehkai bad ban jur ruh halor ka jingdonkam ban pynneh pynsah ia ki jaka ialehkai ba la pynioh sha ki nongshong shnong jong ka thain.

Ka Kong Santa ka la pynpaw ruh halor ka jingdonkam ban tei shuh shuh ia ki jaka ialehkai na ka bynta nongialehkai sports ka district khnang ban pynrung ia ka mynsiem ialehkai hapdeng ki samla jong ka thain bad pynshlur ia ki ba kin thrang ban iashim bynta ha ki jingialehkai sports na ka bynta ki jingmyntoi ha ka liang ka koit ka khiah bad ka bha ka miat.

Haba kren halor kiba bun ki sienjam ba la shim da ka sorkar ban kyntiew ia ki kam pynroi ha ki bynta bapher bapher kynthup naduh ka pule puthi, ka koit ka khiah, ka sports bad kiwei kiwei, ka MLA ka la pynbna ba ka project ban pynbha ia ka surok kaba pyniasoh ia ka Sutnga bad ka Saipung ka la don lypa ha ka jingpynkhreh bad ka kyrmen ba ka jingpyntrei ia ka kam kan sdang noh ha kine ki saw san bnai ki ban wan.

U Deputy Commissioner ka District u Shivansh Awasthi, IAS ha ka jingkren u la ai khublei ia ki nongshong shnong ka Saipung halor ka jingpynioh jaka ban shna ia kane ka madan futsal bad kyntu iaki samla ka thain ki ban pyndonkam ia ka ba kin shim ia ka sport ym tang kum ka jingialehkai myllen hynrei ruh ka lad kamai kajih bad ka koit ka koit ka khiah kumjuh.

U la pynpaw ruh ia ka jingkyrmen ba da ka jingtei shuh shuh ia ki madan bad ki jaka ialehkai hapoh ka district, ki samla kin lah ban kiew bad paw ha ki kam ialehkai bapher bapher ha ka kyrdan jong ka Jylla bad ka Ri kynthup ha ka National Games ka ban long ha Meghalaya ha u snem 2027.

Kiwei pat kiba la aijingkren ha kane ka jingialang ki kynthup ia u MDC ka thain, u Bah Lalwilliam Thiaite, Block Development Officer (BDO), Dr. R Pyrtuh, Sirdar, Saipung Elaka, Zosiama Thianglai bad u Rangbah Shnong Saipung u Lalniama Nampui nalor ki nongshong shnong.