Plie ka Myntri Pla Tyngka ka Sorkar Pdeng ia ka Polo Commercial Complex kaba T.100 klur ha Shillong

Syllad | The Rising MeghalayaJuly 11, 2025

Ka Myntri Pla Tyngka ka Sorkar Pdeng ka Nirmala Sitharaman haka 10 tarik Naitung ka la plie paidbah ia ka Polo Commercial Complex kaba la tei ha ka jinglut kaba kot T.100.33 klur hapoh jong ka Smart City Mission ha ka jingiadon lang u Myntri Rangbah ka Jylla u Conrad K Sangma.

Kane ka jingtei ka long ruh u mawjam ba kongsan ha ka jingsdang ban kyntiew ia ki jingtei kiba kongsan ha kane ka Nongbah Shillong bad kiwei pat ki jaka sor jong ka jylla lyngba ka Smart Cities Mission.

Ia kane ka Complex la tei ha ka jaka kaba 1.7 lak sqft bad ka ban ai jaka na ka bynta 109 tylli ki dukan, ki jaka bam, ki jaka ialehkai ne Gaming Zone, ka jaka pynieng ia haduh kumba 86 tylli ki kali bad 50 tylli ki kali ar shaka nalor kiwei pat.

Haba pdiang sngewbha ia kane ka Myntri ka Sorkar Pdeng, u Conrad Sangma u la pynpaw ka jingsngewnguh ia ka jingwan jngoh ba saw sngi jong ka sha Meghalaya bad ong ba ki la angnud la slem ia kane ka prokram kaba la urlong mynta ka sngi bad ka ban long ka sngi sah jingkynmaw da kaba pyrto ruh ia ka jingkyrshan kaba bteng jong ka na ka bynta ka Meghalaya bad ka thain Shatei Lammihngi.

U la ong lyngba ka Special Assistance to States for Capital Investment (SASCI) scheme la lah ban kyntiew ia ki project kiba iadei bad ki jingtei bapher bapher hapoh ka jylla, da kaba ai burom kyrpang ia ka Myntri Pla Tyngka halor ka bynta kaba ka la shim ban pynioh ia ki song jingiarap pisa lyngba kane ka skhim.

Nalor kata ula shim ia kane ka Commercial Complex kum ka jingsdang jong ka jingpynkylla dur ia ka sor Shillong, bad u la pynbna ruh ha kaba iadei bad ka jingthmu ban tei ia ka Riverfront Beautification Project kaba la sdang iaid shakhmat nalor ki jingtei kiba iadei bad ki kam ialehkai, ki kam jngohkai bad ka jingtei ia ki jaka treikam bapher bapher.

U Myntri Rangbah u la ong ruh ba ia kane ka Complex shen yn sa khot tender ban pyniaid da ki riew shimet bad la khmih lynti ba kan long ka jaka pdeng na ka bynta ban sengkam sengjam hapdeng ki samla bad na ka bynta ki kam jngohkai.

U la ong ruh ba ka sorkar ka dang pynkhreh ban pyntreikam ia ki sienjam ban pynduna ia ka jingkhapngiah jong ka sor Shillong da kaba pynkynriah noh ia ki bynta kiba kongsan shapoh New Shillong Township.

Ha kane ka prokram la iadonlang u Symbud Myntri Rangbah ka jylla u Bah Sniawbhalang Dhar uba khmih ruh ia ka kam Pynroi Sor, ka Myntri ka tnad ka Koit ka khiah ka Kong Ampareen Lyngdoh, u Chief Secretary ka jylla u Bah DP Wahlang, ki heh ophisar sorkar nalor kiwei kiwei.