Plie ia u mot dur jong u Woh Tep Kyndait ha Tuber Kmaishnong

Syllad | The Rising MeghalayaJanuary 18, 2024

Ban pynsah jingkynmaw ia u riewkhraw jong ka Raij Tuber bad uba dei ruh u khlawait jong ka Rilum Jaintia, ka Seinraij Tuber ka la tei da u mot dur (Statue) jong u Woh Tep Kyndait haka lyngkhuh sngi iap ba 355 snem ha Tuber Kmai shnong.

Ia une u mot dur sahnam la wan ban plie pyrda haka 17 tarik Kyllalyngkot- kaba dei ka sngi kaba u shah pyniap ha u syiem Jaintiapur ha u snem 1669 da u symbud Myntri rangbah ka Jylla Bah Sniawbhalang Dhar haka jingdonlang u myntri ka sorkar Jylla u Bah Kyrmen Shylla uba dei ruh u MLA ka thain, u MLA ka Jowai Wailadmiki Shylla, ki MDC, ki riew rangbah ka Raij nalor kiwei kiwei.

Iaka jingialang la pyniaid da u Bah Harvis Phawa President Seinraij Tuber bad la ioh ka nguhblei nguhsyiem na u Shanly Rymbai u Langdoh ka Raij Tuber bad ki kyntien pdiang burom na u Jolby Sana, u General Secretary, Seinraij Tuber.

U Sniawbhalang Dhar haka jingkren ula ong donkam ka jingiatreilang ki riew rangbah bad ula iaroh iaka Raij Tuber ba haki phew snem kiba la leit la sakhi ba haka Behdieñkhlam la riam da ki sut, ki ryndia, ki muka kiba dei ki riam kiba shongkhia bha.

Ula ong ha kane ka juk kaba mynta donkam ban don ruh iaka akor ka burom wat lada um lah ban kynjoh 100 Percent hynrei dei ban pyrshang ban poi sha kata.

Ula kular ruh ban iatreilang ryngkat bad u MLA ka thain ban wanrah iaka surok ka ban leit sha Khloo Blai ban pynsuk iaki nongleit nongwan sha kane ka jaka.

Iaka khana lyngkot shaphang u Woh Tep Kyndait la iathuh da u Bah Helping Phawa uba dei u nongaibuit ka Seiñraij Tuber.

Ha kane ka sngi la ioh ka jingkren na u Bah Kyrmen Shylla, Wailadmiki Shylla, Leiky Sayoo, General Secretary Seiñ Kyntu Seiñ Raij 12-Dolloi, Puramon Kynjing Dolloi Elaka Jowai bad na u Tellme True Phawa, General Secretary Shnong Tuber.

La pynphuh pynphieng iaka jingialang da ki jingshad jingrwai.