Phra sngi ai bor ka iingkashari ban tohkit ia ka Sonam bad ki 4 ngut halor ka kam pyniap

Syllad | The Rising MeghalayaJune 11, 2025

Ka Iingkashari Chief Judicial Magistrate (CJM) haka 11 tarik Jylliew ka la ai bor ia ki pulit ban set phra sngi ia ka Sonam Raghuvanshi bad ia ki 4 ngut kiwei pat na ka bynta ban pynlong ia ka jingtohkit halor ka jingdonkti ha ka jingjia shah pyniap ba dang shen jong u Raja Raghuvanshi uba dei na Indore ha ka jingwan shangkai sngewbha bad ka ka kurim jong u kaba la shah kynnoh donkti sha ka thain Sohra.

“Ka Iingkashari ka la ai bor ban set 8 sngi ia baroh kine ki san ngut hadien ba la ialam tian bishar ia ki hynne ka sngi Balang hadien ba la wanlam ia ki na Madhya Pradesh bad Uttar Pradesh,” ong u Superintendent of Police ka East Khasi Hills, u Bah Vivek Syiem haba kren sha ki lad pathai khubor.

Ia ka Sonam la kem noh na Uttar Pradesh hadien ba ka la leit pyndem ialade ha Nandganj police station ha Ghazipur district, UP katba ia ki saw ngut kiwei pat, kata ia u samla jong ka Sonam u Raj Khuswaha (21), Akash Rajput (19) na Lalitpur, u Vishal Singh Chauhan (22) bad u Anand Kuli (23 snem rta) la ioh ban kem noh na Indore, MP.

“Ka jingtohkit kan sa sdang shen mar ia ioh ia ka jingbit. Ngi la pan por 10 sngi ban tohkit, hynrei ka iingkashari ka la ai por 8 sngi, bad lada dang donkam ngin sa buh ka jingkyrpad,” ong u AP.

Haba kylli, u SP u la ong ba haduh mynta hi ki pulit ki la ioh ban kem noh ia san ngut halor kane ka jingjia. “Hadien ka jingtohkit ngin sa lah ban pynthikna la ki dei tang kine ki briew kiba donkti ha kane ka kam pyntriem ne ki dang don shuh shuh kiwei pat,” u la bynrap.

Halor ka jingpynwandur biang ia ka jingjia jong ka kam pyniap, u SP u la ong ba ia kine ki san ngut kin ym ialam satia lashai ka sngi sha Sohra namar ki dang hap ban bishar bad tohkit shwa.

“Kam pat dei lashai. Ngin hap ban tohkit shwa ia ki. Hadien ba ngi la dep tohkit bad shim ia ki jingphla jong ki bad ynda ngi la ioh ia ki jingshisha baroh halor kane ka jingjia, ka SIT kan sa rai ia ka sngi lano kin leit sha Sohra na ka bynta ka jingpynwandur biang ia kane ka jingjia kam pyntriem baroh,” u la ong.

Nalor kata u Bah Vivek u la ong ba katkum ka medical report jong ka Sonam ka pyni ba kam pat shym la armet satia.

“Hooid ka Sonam ka donkti. Ia ka jingphla lah ban ai tang hapoh ka Iingkashari. Hadien ka jingtohkit ngin sa lah ban tip haduh katno kata ka jingdon bynta ka jong ka bad ban pynthikna ia ki jingtip kiba bniah halor ka jingdonkti ka jong ka,” ong u SP haba bynrap, “Ia ka kam iasylla yn sa lah ban pynthikna hadien ba la pynlong ia ka jingtohkit.”

Halor ka jinglong jingman ha ka liang ka suk ka sain namar kane ka jingjia, une u heh pulit u la ong ba ki la shim ia baroh ki sienjam kiba donkam.

“Ki nongshong shnong ka thain Sohra kim dei kiba leh donbor. Nga la ong kham hashwa ba wat hapdeng ki jingshah kynthoh sniew hynrei ki la bteng ban iarap ha ka jingwad bad ki la bteng ban aijingtip bad ki la iatreilang bad iarap pynshet ruh na ka bynta ki kynhun kiba pynlong ia ka jingwad bad ngam iohi ia kano kano ka jingsyier.