Phooh pheiñ ka Dorbar Ñiamtre ki khon ka Ri 12 Dolloi 30 Syiem ha chnong Cham Cham

Syllad | The Rising MeghalayaDecember 24, 2023

Ka Seiñraij Jwai deilang ka Seiñraij Cham Cham ha ka thong wow pynskem pynskit yei man kyrpang ka jaitbru Ñiawtrep Ñiawskum ha ka sngi Musiang 23 wa ka Muchai 24 tarik Kmaichonglad da pynman ki ya ka Dorbar Ñiamtre ha Madan Ball Cham Cham.

Ha ka sngi nyngkong iong kani ka Dorbar Ñiamtre da em i wai ya ki Moonam Moopynyien wa da chna kyrpang wow pynsah kynmoo ya ka Dorbar Niamtre wa 18 ka Ri 12 Dolloi-30 Syiem ha chnong Cham Cham da u OHToi, President Seinraij Jwai hei sakhilang ki Waheh wasian ka Seinraij Cham Cham wa ki khon khynroo khyllood wa mihkhmat na ki chnong ki raij wapher katwa hei janmiet wan da em ka prokram kyrpang ya ki khon khynroo khyllood hei peit i pynlai ka Khynroo Khyllood Comittee iong ka Seinraij Jwai.

Ha ka sngi wabood iong kani ka Dorbar Ñiamtre wada pynman ha madan Ball Cham Cham ki khon ka ñiamtre na kylleiñ ki chnong ki raij dawan embyntalang ki hei riam I beit wa ioophooh ioopheiñ heiwa u Pator Raij Jwai, Waheh Raymond Nartiang kam u chongknor da e u ki kyntien yahkhmat heiyatoh wa ka thong iong I pynman ya kani ka Dorbar Ñiamtre ha kylleiñ ki chnong ki Raij katwa u Soimon Phawa kam uwi na ki waheh wasian ka Seinraij Cham Cham da siang u ki kyntien ngoohblai ngoohsyiem, pynbood I pynher lama da ka Men Mili Dkhar kawi na ki manbei wa daheh rta ha chnong Cham Cham, ki kyntien pdiang burom wan da pachat da u Stop Phawa, Secretary Seinraij Cham Cham katwa U Nit Dkhar wan kam uwi na ki waheh wasian ka Chnong Cham Cham da khan pynsniaw u yei parom watbian ka Chnong Cham Cham.

Ha kani ka Dorbar Niamtre ki mat ki phang wa da klam da pynsniaw toh “I kamram ki khon ka Niamtre neibynta ka Mynried” wada klam da pachat da u Harwis Phawa, President Seinraij Tuber, “ka Jaitbynriew ba la pynkyrpang ha ryngkat bad ka Niam” da klam da u Rangbah Kynpham Sing Nongkynrih, Seng Khasi Kmie Ṁawkhar wa “Ka Niamtre ka Niam Tipbru Tipblai” wa da klam pynsniaw da u Pa Dolloi ka Elaka Jwai Waheh Puramon Kynjin.

Neiliang u Rangbah Kynpham Sing Nongkynrih hei kdar ya ki kyntien wa ong “ka Jaitbynriew ba la pynkyrpang ha ryngkat bad ka Niam”, da khana batai u chaphang ka Tipbriew-Tipblei, Tipkur-Tipkha wa Kamai ia ka Hok.  

Chooh chooh nalor I klam I kappe da pynchongchit pynwyrngia ya kani ka Dorbar Ñiamtre da ki chad ki rwai wada pynkhreh na ki khon khynroo khyllood iong ki Seiñraij wapher wapher wei ha kani ka sngi da em leh i pynlait paidbah ya ka Almanak 2024 iong ka Khynroo Khyllood Committee da u O.H.Toi, President Seinraij Jwai.

Khatdooh chwa wow poi ka bynta wakut iong kani ka Dorbar, ka Khlung Dkhar, Secretary Sein Kynthai Seinraij Tuber da e ko ki kyntien makhane katwa u woh Dimit Dkhar kam uwi na ki Kñi waheh rta ka Chnong Cham Cham kam ka dak I pynkut ya kani ka Dorbar Niamtre da pynhiar u ya ka lama.