Phla ka Sonam ba iasylla pyniap ia u Raja; kynnoh ia uba ieit kum u ‘mastermind’

Syllad | The Rising MeghalayaJune 12, 2025

Ka Sonam Raghuvanshi ka la phla ia ka jingdon bynta ban iasylla, hynrei ka la kynnoh ia la u jong uba ieit u Raj Kushwaha kum u nongiasylla ba nyngkong eh ne “mastermind” halor kane ka jingshah pyniap u kurim jong ka u Raja Raghuvanshi ha ka jingwan shangkai sngewbha sha Sohra.

“Hooid ka Sonam ka la phla ba ka don bynta ha ka jingiasylla hynrei ka jingkylli kaba iadei bad mano ba iasylla nyngkong halor kane ka kam pyntriem ka dei ka ban hap ban pynshisha namar ka Sonam ka la kynnoh ia u Raj katba u Raj u la kynnoh ia ka Sonam,” ong u DIG (Eastern Range) u Davis NR Marak haka 12 tarik Jylliew haba iasam ia ki jingtip halor ka jingtohkit kaba dang iaid shakhmat pyrshah ia ka Sonam, u Raj bad ki laingut kiwei pat ki runar kiba kynthup ia u Akash Rajput, Vishal Singh Chauhan bad u Anand Kurmi da ka kynhun Special Investigation Team (SIT) hadien ba ka Iingkashari ka la ai bor phra sngi ban pynlong ia ka jingtohkit.

Katba ka jingpynpaw ka jong u, ka Sonam bad u Raj ki dei kiba la shah kynnoh donkti hakhmat eh namar ka jingkynnoh ba ki don ia ka jingiadei jingieit kaba rieh.

“Haduh mynta hi ki dang dei kiba shah suba donkti hakhmat eh. Watla katta mano ba dei ki nongsylla ba nyngkong, mano ban sdang ia kane ka kam iasylla ka dang donkam ia kaban dang pynthikna mynta,” u la ong.

“La ka Sonam ka la kular ban siew T.20 lak sha kine ki laingut ki nongpyniap briew, u Marak u la ong, “Kane ka dang don hapdeng ka jingtohkit bad kane ka dei ka jingkylli kaba ngi la kylli ia kiba shah kynnoh donkti ia mynta hi, kumta ia mynta hi ngam pat lah ban ong ei ei halor kane ka bynta.”

La ka Sonam ka la siew teng ia kano kano ka pisa, u la ong, “Ia kane ngin dang pynthikna lyngba ka jingtohkit bad haba pynshong nongrim lyngba ki jingbatai jong ki ngin sa lah ban pynshisha ia kaei kaba ka ong bad hadien kane ngin sa lah ban ong katno lane ha kano ka rukom la pyniaid ia ka jingsiew pisa.”

Nalor kata une u heh pulit u la iathuh ruh ba ha ka jingtohkit, ka Sonam ka la kyntait ba ka la pom ia u Raja da ka wait, bad na ka jingiathuh jong kiba shah kynnoh, la iohi ba dei kine ki lai ngut kiba pyniap ia u Raja ha ka 23 tarik u Jymmang ba la dep ia kaba ki la pynthikna ba ki la leh ia kane ha Weisawdong, ka jaka ha kaba la lap ia ka metiap ba la kem pyut jong u Raja ha ka 2 tarik u Jylliew.

U la pynthikna ruh ba ka Sonam ka la iarap ia kine ki nongpyniap ban rah ia ka met jong u Raja bad ban leit bret sha katei ka riat kaba jylliew ha Weisawdong.

“Hooid, ka jingphla jong kine kiba shah kynnoh (ki nongpyniap) ka pynpaw ba ka Sonam ruh ka la iarap ban bret ia ka met jong u Raja hadien ba la pyniap ia u, ka la iarap ban rah ia ka met bad ban bret sha katei ka jaka riat.”

Haba kylli u DIG u pyntip shuh shuh ba baroh kine kiba shah kynnoh donkti yn sa ialam sha Sohra ban pynwandur biang ia ka kam pyntriem kaba ki la leh hadien ba la pyndep ia ka jingtohkit.

La kine kiba shah kynnoh ki la leit swait shwa ia ka Weisawdong hashwa ba kin leh ia kane ka kam pyniap, u Marak u la ong ba ia mynta hi kiba shah kynnoh ki la kyntait hynrei ngim pat lah ban batai namar kine ki dang don hapdeng ka jingtohkit.

Halor kawei pat ka jingkylli la ki pulit kin pan jingmut ne em na ka iingkashari ban pyndonkam da ki lying detector ne ki kor ban ioh kem ia ki jingbatai kiba shu thok, u DIG u la ong, “Ha kaba nyngkong ba ki la ai ia ki jingbatai, ngi hap ban pynshisha ia kata. Lada ki ong ba kila leh ia kane lane ngi la leit sha kata ka jaka, ngi hap ban leit pynshisha hi da lade ia kane ka jingbatai ka jong ki ka iahap ne em, bad ia kane ngin hap ban leit hi da lade ban pynshisha ia ki jingiathuh ka jong ki.”

Nalor kata u pyntip ruh ba ki pulit ka jylla kin pan ia ka jingiarap na ki pulit ka Guwahati bad na kiwei pat ki jylla lada ki donkam ia ki jingiarap jong ki. U la ong ruh ba baroh ki briew kiba donkti halor kane ka jingshah pyniap jong u Raja ki la shah kem, bad lada ki dang don shuh kiba donkti yn sa lap lyngba ka jingtohkit kaba dang bteng, u la bynrap.

Ha ka jingtohkit la lap ba ki don laitylli ki scooty ba la wai na Shillong. Ka scooty ba la pyndonkam da ka Sonam bad u Raja la pynieng ha Sohra Rim bad ia kaba la ioh ban kurup noh da ki pulit. Mynta ki pulit ki dang tohkit ha kaba iadei bad kine ki artylli kiwei pat ki scooty ba la pyndonkam da kine ki nongpyniap briew.

“Hadien ba la leh ia ka kam pyniap, la iohi kumba shiteng lynti ka la leit lang noh bad kine ki laingut ki runar haduh Mawkdok bad nangne la iohi kumba kine ki runar ki la iaid shakhmat katba ka Sonam ka la leit sha Guwahati bad hadien sha Indore,” ong u Marak.

“Ka lah ban dei ki nongpyniap contract killer ne ka Sonam hi (kaba la iehnoh ia ka scooty ha Sohra Rim) namar ha kata ka por ki don lai tylli ki scooty bad ka paw ba ki don lang bad ki la iehnoh ia ka scooty ha Sohra Rim ryngkat bad ki shabi jong ka scooty, hadien kata ka Sonam ka la kiew lang ha ka scooty bad ki nongpyniap killer bad iaid shakhmat,” ula ong.