Phiel ka jingtei Residential School ha Pdengshakap, lap ka KSU ba leh torti u kontrak

Syllad | The Rising MeghalayaOctober 4, 2020

Ka Khasi Students’ Union (KSU) War Jaintia Circle kala kynnoh b aka jingshna iaka Residential School ha Pdengshakap kala long kaba torti bad kala pynrem jur ïa iaki ophisar jong ka tnad PWD kiba ym shym la kynthoh ne pyrshah iaka rukom trei u kontrak ia kane ka skul.

Ka KSU haka jingialam u Laitphar Syngkrem, president KSU, Lurman B Talang general secretary KSU, ha ka jingiadonlang u Leningrad Tariang ba dei peit iaka War Jaintia Circle bad kiwei kiwei ki dkhot ka KSU haka jingiadonlang u waheh shnong Pdengshakap u Forward Shylla bad Secretary Shnong Shailang Pakyntein kila jurip ia kane ka skul haka 3 tarik une u bnai.

Ka KSU ha ka jingjurip kala lap shibun ki jingduna ha ka rukom shna ia kane ka skul bad la kynnoh ba u kontrak ba tei ia kane ka skul ula pyntrei tang dep rukom ia kane ka shlem ka ban ai jingnang jingstad iaki khynnah ka thain War Jaintia.

“Ngi pynrem ia u kontrak bad ruh iaki ophisar ka PWD kiba jurip iaka jingtei haka por ba shna khlem ha kaba ki khlem ai kano kano ka jingkynthoh halor ka rukom trei torti bad trei tang dep ia kane ka iing skul bad la lap ba kane ka skul kala kylla long pung um namar bym shym la shna bha iaka slab,” la ong ka KSU.

Ka KSU kala ong ba kan nym shong kli kti bad kan wad ka jingtip ba bniah da ka RTI halor ka jingshna ia kane ka skul.

Ia kane ka skul la shna ha Sah Rymbuo, Pdengshakap, Amlarem Sub Division, West Jaiñtia Hills District bad naduh ba sdang hi ban shna ia kane ka skul la paw ki dak ki shin ba phiel watla iaka jaka la ai sngewbha da ka dorbar shnong kaba heh 20 acre sha ka tnad Pule Puthi ban myntoi ki nongshong shnong bad ki shnong ba marjan

Ka jinglong jingman katei ka ïing skul (residential school) kaba la dep tei mynta ka pynnoh mynsiem ïaka bor shnong bad ki paidbah ka thain War namar baka rukom trei kam dei satia katkum ka rukom bad ka jingmang bad la kynnoh ruh ba la shna da u mawblock ha jaka u mawit ban ker ïa ki kynroh hapoh kamra.

Ka jinglut ban tei ia kane ka skul kam duna ïa ka T.2.48 Klur kaba la bei pisa lyngba ka SPA 2015.

Haka por ba dang iaid ka jingtrei ruh ka bor shnong kala dep ujor sha ka Executive Engineer ka tnad PWD Building ha u snem 2015 ba don ka jingorpait ka biar ha katei ka iing skul.