Phasi u nongialam ka kynhun runar ialade hapoh Khanapara police station

Syllad | The Rising MeghalayaApril 27, 2024

U nongialam jong kawei ka kynhun runar kaba kieng atiar u la pynkut noh ia la ka jong ka jingim da kaba phasi ia lade ha ka step sngi Thohdieng ba la lah hapoh ka along ha Khanapara police station.

Une u runar u dei uba la tip kyrteng kum u Rudra Rabha uba la shah kem noh halor ka case kaba iadei bad ki tiar siat ha ka 24 tarik mynta u bnai bad tian bishar hapoh ka iingkashari ha ka 25 tarik mynta u bnai, hadien ba ka iingkashari ka la hukum ban set na ka bynta san sngi hapoh ka along jong ki pulit.

“Ha ka por ba la pynlong ia ka jingtohkit ia une u runar halor ka case ba la pynngat pyrshah ia u hapoh ka along jong ki pulit, une u briew u la phla ba u la buhrieh ia kawei ka pistol shna hi sha ka jaka khlaw bad pynpaw ruh ba u long lakloi ban ialam ia ka kynhun ki pulit sha katei ka jaka ban leit shimti ia katei ka tiar siat,” ong u Superintendent of Police ka Ri-Bhoi District, u Jagpal Singh Dhanoa lyngba u kyrwoh.

Kumta u la ong ba da ka jingialam lynti jong une u briew, ki pulit ki la ioh ban kurup noh ia kane ka tiar siat na ki bynta jong ka khlaw Ranibari ha ka jingiadon lang ki sakhi ba shimet.

U SP u pyntip ruh ba hadien ba la leh ia kaba donkam baroh  katkum ki kyndon ain ha kane ka jaka ba la ioh kurup ia ka tiar siat, ki pulit ki la wanlam noh ia une u briew shapoh Khanapara police statin ha ka por 1.05 mynstep jong ka 26 tarik bad set hapoh ka along jong ki pulit na ka bynta ka jingshngain namar ba ym don jaka set hapoh Rani Jirang BOP.

Hynrei, ha ka step sngi Thohdieng ha ka por kumba 4 baje mynstep, u nongap pahara u la shem ba u Rudra Rabha u la pynkut noh ia la ka jong ka jingim hapoh ka along jong ka police station da kaba phasi nalor ki nar jingker jong ka along da kaba pyndonkam da ka jain kaba lehse u la tar na ka jain siang thiah ba la ai ba un pyndonkam hapoh ka along ba u shong, ong u SP.

Ha kaba iadei bad kane ka jingjia, na ka liang ka ophis u Deputy Commissioner Ri Bhoi ka la phah ia u Executive Magistrate na ka bynta ban khmih halor ka jingpyndep ia ka jingleh post mortem ha ka jingiadon lang u medical officer ha ryngkat ka jingring video bad shondur ha kane ka jaka,” ong shuh shuh utei u heh pulit uba la bynrap ruh ba ka jingtohkit halor kane ka bynta ka la iaid shakhmat.