Phah tohkit u DC halor ka jingiap doh um ha Wah Prang hadien ka jingujor u Andrias Talang, kyrshan ki 8 shnong

Syllad | The Rising MeghalayaJune 26, 2025

Ka 8-Shnong Aquatic Life Environment Protection Council, East Jaintia Hills District ka ai ka jingkyrshan kaba pura ia ka jingphah tohkit na u Deputy Commissioner ka district sha u Superintendent ka Fisheries Department, Khliehriat halor ka jingiap doh um ha Wah Prang, kaba la ju jia man ka snem ha ka por ba wan u slap thymmai jong ka aiom lyiur.

Ka jingphah tohkit ka la mih na ka jingujor u samla Andrias Talang, uba dei u samla pule law ha North-Eastern Hill University (NEHU), Shillong. U samla Andrias u la dawa ba dei ban shimkhia bad tohkit bniah halor ka daw kaba pynlong ia ki doh um ba iap ha katei ka wah, kaba long ka jingma ha ka koit ka khiah jong ki paidbah, khamtam kito kiba im ja na ka ba khwai bad tong doh na katei ka wah ha ki shnong kiba don sawdong kum ka Lama, Borghat, Hingaria bad kiwei de.

U Andrias u la pynpaw ruh ba dei ban leh eiei mardor namar bun na ki nongshong shnong ki shaniah ha katei ka wah bad kamai ja kpoh, hynrei lada ki doh um ki long kiba don bih ne bymbit shuh ban bam, kane ka lah ban wanrah jingma ia ka koit ka khiah jong ki paidbah.

Halor kane ka jingtohkit, ka 8-Shnong Aquatic Life Environment Protection Council lyngba u u Johnmiki Pala, General Secretary bad u Samson Lamin, Publicity Secretary ka la pynpaw ka jingpynsngewnguh bad jingkyrshan pura ia u samla Andrias Talang halor ka jingshimkhia jong u. Ka Council ka ong ruh ba katei ka wah ka dei kawei na ki tyllong ba heh duh jong ka dohum ba dang im hapoh East Jaintia Hills, kaba ki paidbah ki ju ioh ban khwai doh watla manla u snem ka don ka jingjia jingiap doh.

Ka Council ka pynpaw ruh ba ki doh um ki ju wan kiew biang sha katei ka wah na ki bynta jong ka ri thor Bangladesh haba ka um ka la kiew bad duna ka kynja bih na ka um.

Na kane ka daw, ka Council ka kyntu jur ia ki paidbah ban dang shah shipor ha ka jingkhang ban khwai ne bam doh na katei ka wah haduh ba ka report na ka Fisheries Department kan paw shai. Kane ka long na ka bynta ka jingmyntoi lang jong ka koit ka khiah bad ka jingbha jong baroh.

Ka Council ka la rai ruh ban iai buddien bad ia treilang bad ki bor sorkar halor kane ka kam, na ka bynta ban pynneh pynsah ia katei ka wah kumba ka ju long mynshwa—ka tyllong dohum ba khuid, ba im, bad ba ai jingmyntoi sha ki paidbah ka rilum Jaintia bad ki nongwan khwai na kylleng.