Phah tohkit bniah ka CAG ba duna ka jingioh lum khajna na ka kyiad haduh T.14.58 klur

Syllad | The Rising MeghalayaMarch 16, 2025

Ka jingbym lah jong ka Tnad Exicse ban lum ia ka khajna excise duty bad kaba la lam sha ka jingduna ha ka jingioh lum khajna kaba long haduh T.14.58 klur ka la pynlong ia ka CAG ba kan aijingmut ban pynlong da ka jingtohkit kaba bniah halor ki jingleh bakla bad ban pyntreikam pyrkhing ia ki jingpynbna ka sorkar ha kaba iadei bad ka dor jong ka khajna.

Ka jingleh ia ka audit halor ki rekod kiba iadei bad u Superintendent of Excise (SE), Tura hapdeng u bnai Iaiong 2018 haduh u Lber 2019, la shem ba ka Tnad ka khlem lum ia ka excise duty katkum ka dor ba la buh, bad kumta ruh kane ka la lam sha ka jingduna ha ka jinglum ia ka khajna kaba kot haduh T.14.58 klur, ong ka CAG ha ka kaiphod halor ka jingioh lum pisa jong ka sorkar kat haduh u snem ba kut ha ka 31 tarik Lber 2023.

Na baroh ka excise duty kaba dei ban siew kaba long T.41.90 klur, ka khajna ba la lum na ki laitylli ki Bonded Warehouse ka (M/s Hill View Bonded Warehouse, Araimile,West Garo Hills, M/s Gloria Bonded Warehouse, Tura bad ka M/s Tura Bonded Warehouse) ka long T.27.32 klur, bad kumta ka la don ka jingduna kaba kot T.14.58 klur, kata da haduh 35 percent.

“Ia kine ki jingbym iahap la pyntip sha u Superintendents of Excise, Tura ha u bnai Jylliew 2020, bad kumjuh sha ka sorkar ha u Nailur 2023,” ka la ong.

Ha u bnai Nohprah 2023, u Commissioner of Excise, Meghalaya u la phah ia ka jingthoh ban pan ia ka jubab na kine ki warehouse ki bym shym la siew ia ka khajna.

Nalor kata u Superintendent of Excise, Tura ula pynmih ia ka hukum ban siew ia ka pisa ba duna sha kitei ki Bonded Warehouse bad kumjuh sha ki officer incharge ha u Kyllalyngkot 2024.

Ia ki jingtip kiba bniah ha kaba iadei bad ka jingioh lum ia ka pisa kaba duna ym pat aijingtip satia na ka bynta ka Audit (Iaiong 2024).