Phah pyndam ki 8 seng iaka jingpynbna ban pynkynriah iaka PWD North Div, Jowai

Syllad | The Rising MeghalayaJuly 20, 2020

Ka kynhun jong ki phra tylli ki Sengbhalang kiba kynthup iaka All Jaintia Hills Social Welfare Organization (AJHSWO), Jaintia Contractor & Supplier Association (JCSA), Jaintia National People Organization (JNPO), All Hynniewtrep People United Front (AHPUF), All Meghalaya People Organization (AMPO), Niaw Wasa Youth Federation (NWYF), Society for Environment Protection and Sustainable Development (SEPSD), bad ka Fight Against Corruption Team (FACT) kila dawa na ka sorkar ban pyndam iaka jingpynbna ban pynkynriah iaka PWD North Division, Jowai sha Shangpung.

Kine ki phra seng kila phah da ka dorkhat sha u Deputy Chief Minister Bah Prestone Tynsong ban kyrpad ia u ban pyndam iaka jingpynbna ka sorkar ban pynkynriah iaka PWD (Rds) North Division Jowai sha Shangpung haka 16 tarik une u bnai.

Kine ki phra seng kila pynpaw iaka jingbym sngewiahap iaka jingthmu pynkynriah iaka PWD North Division, Jowai sha ka shnong Shangpung namar ba kane ka ophis kala ai jingshakri ia u paidbah ka Rilum Jaintia naduh ba la ioh iaka District ba pura.

“Ka jingkam ba kane ka Division ka ai jingshakri tang iaki shnong kiba hap hapoh ka Laskein C&RD Block ka long kaba bakla namar ngi tip shai ba dang bun ki shnong kiba hap hapoh ka Thadlaskein C&RD Block ruh kiba hap hapoh ka jingpeit kane ka Division.

Ngi dawa naka sorkar jylla ba horkit hordang ym dei ban pynkynriah iakatei ka Division bad dei ban thaw shisyndon daka division kaba thymmai haka shnong Shangpung namar kala don lypa iaka Sub-Division Office lada ka sorkar ka thrang ban wanrah iaka roi ka par bad ym dei ban shu leh politics,” ong u Ram Biam president All Jaintia Hills Social Welfare Organization (AJHSWO)

Shuh shuh kine ki phra seng katkum ka dorkhat kila ong ruh lada iaid shakhmat ka jingpynkynriah ia kane ka ophis ktah ruh iaka jinglut jingsep ki kontraktor kiba dei kam bad kane ka ophis kumjuh iaki paidbah namar ba ka jngai ka lynti ban leit shaduh sha Shangpung na Jowai, ka District headquarter jong ka West Jaintia Hills District.