Phah khang khyrdep u DC ia baroh ki jaka jngohkai ha West Jaintia Hills

Syllad | The Rising MeghalayaJune 1, 2025

Namar ka jinghap slap kaba dang iai bteng bad kaba buh jingma ia ki nongwan shangkai, na ka liang u Deputy Commissioner ka West Jaintia Hills District, u Abhinav Kumar Singh u la pynmih ia ka hukum ban khang khyrdep ia baroh ki jaka jngohkai hapoh ka District naduh ka 31 tarik Jymmang tad haduh ban da pynbna da kumwei pat.

Da kaba kdew halor ka jinghap slap kaba dang iai bteng naduh kine ki khyndiat sngi ba la dep, kane ka hukum ka kdew ba ka jinglong jingman ka lah ban buh jingma shibun ia kito kiba leit shangkai sha ki jaka jngohkai bapher bapher, bad kumta kalong kaba donkam ban shim mardor ia ki lad jingiada na ka bynta ka jingshngain jong ki mynsiem briew.

Ia kane ka hukum la pynjari mardor hapoh ka kyndon Section 34(m) jong ka Disaster Management Act, 2005, namar ka jinglong kyrkieh ka kam.