Phah khang khyrdep ka Magistrate ia ka lynti ba lam sha Kshaid Krangshuri ha Amlarem

Syllad | The Rising MeghalayaJune 7, 2025

Ka Divisional Magistrate Amlarem Civil Sub Division, West Jaintia Hills ka Anendya Raajsshre, IAS, ka la pynmih ia ka hukum ban khang khyrdep mardor ia ka lynti iaid kjat kaba la rim bha (heritage path) kaba lam sha Kshaid Krangshuri ha Amlarem hapoh ka kyndon 164 jong ka Bharatiya Nagarik Suraksha Sanhita, 2023.

Kano kano ka jingpynkhein ia kane ka hukum kin ngat ha ka  jingshah pynshitom katkum ki kyndon ka BNSS, 2023, bad kiwei kiwei pat ki kyndon ain.

La pynmih ia kane ka hukum hadien ka jingioh pdiang ia ka jingtip ba kane lynti heritage path kaba lam sha ka kshaid Krangshuri kaba don ha Amlarem ka la sniew sha ba palat bad ka la buh ka jingbym shngain na ka bynta ki nongleit nongwan.

Kumta ka long kaba donkam ban shim ia ki lad jingiada mardor khnang ban lait na kano kano ka jingjia kaba sniew, namar ba katei ka lynti ka dei kaba ju iaid bha da ki nongwan shangkai pyrthei, ki nongshong shnong bad ki nongleit nongwan, khamtam ha ka samoi ba jur bha ki nongwan shangkai.