Pdiang ka kynhun Myntri ia ka kaiphod ka MPSC Reforms Report ban pynjanai ia jingtreikam ka MPSC

Syllad | The Rising MeghalayaAugust 27, 2025

Ka Kynhun Myntri ka Sorkar Jylla ka la pdiang ia ka kaiphot jong ka Meghalaya Public Service Commission Reforms Committee (MPSCRC), kaba thmu ban pynjanai ia ki rukom treikam, ka jingmih bad ka jingkhuid bad shai ha ka rukom thungkam ba la pyniaid da ka Meghalaya Public Service Commission (MPSC).

Ia kane ka kaiphot la aiti da ka Committee ba la khlieh da u Principal Secretary u Bah FR Kharkongor.

“Ka Committee kala aiti ia ka kaiphot jong ka bad ngi la pdiang ia kane ka kaiphot kumba ka long ha ka jingialang jong ka Kynhun Myntri kaba la long mynta ka sngi,” ong u Myntri Rangbah ka Jylla u Conrad K Sangma haba kren sha ki lad pathai khubor hadien ba la pyniaid ia kane ka jingialang ha ka 26 tarik Nailar.

U Myntri Rangbah u pyntip ruh ba ka Kynhun Myntri ka la aijingmut ruh ban pyndait da ki kor CCTV bad ki kor ban rekod haba pynlong ia ki interview khnang ban pynthikna halor ka jingtreikam kaba shai bad kaba khuid ba suba.

“Nalor ki jingai jingmut jong ka Committee, ka Kynhun Myntri ka la aijingmut ruh ba ka dei ban don ia ki kor CCTV bad ki kor recording kiba biang ha ka por ban pynlong ia ki interview bad ki camera ki dei ban don khnang ba lada mih kino kino ki jingkylli ne kino kino ki kynrum kynram yn lah ban khmih bniah lyngba jong ki,” u la ong haba kular ba shen yn sa pyllait paidbah ia kaiphot ban pynthikna ia ka jingtreikam kaba shai bad kaba khuid ba suba ha kaba pyniaid ia ki eksam thungkam.

Haba kdew halor ki jingpynkylla ba kongsan, u Conrad u la ong ba ki don ki sienjam kiba shipor kiba neh katto katne snem bad ki ban neh slem slem ia kiba la aijingmut da ka Committee.

Ki sienjam kiba shipor ki kynthup ia ki lad ban don buntylli ki board na ka bynta ban pynkloi ia ka jingshim interview, ban buh ia ki protocol kiba iadei bad ki interview, ka jingpynbna ia ki jingdon jingem bad ki ram ki shah da u Chairman bad ki dkhot, ban thaw ia ki grievance cell, ban pyni paidbah ia ki marks ba la ioh da ki kyrtong ba iakhun ia ki eksam, ban pyllait ia ki answer key hadien ka eksam nalor kiwei pat.

Ha kaba iadei bad ki sienjam kiba katto katne snem bad kiba neh slem slem, u Myntri Rangbah u la ong ba ka Committee ka la aijingmut ban leh da ki test lyngba ki kor computer, ban pynkhlain ia ka MPSC cell ha Jowai bad Tura, ban pynlong ia ka Combined Competitive Examination bad ban pynsangeh noh ia ka optional paper.

“Ha kaba iadei bad ka jingpynsangeh noh ia ka optional paper, ngi la dep leh teng ha ka eksam kaba dang shu dep shen jong ka Meghalaya Civil Services (MCS) bad ngin sa leh kumjuh na ka bynta kiwei kiwei pat ki eksam ha ki sngi ki ban dang wan,” u la pynbna.