Pan por u CM 6 bnai ban pyndep jingpyniasoh Aadhaar ki nongioh jingmyntoi na ka SNP

Syllad | The Rising MeghalayaMarch 19, 2025

U Myntri Rangbah ka Jylla u Conrad K Sangma ha ka 19 tarik Lber u la kyrpad ia ka Sorkar Pdeng ba kan ai por hynriew bnai ia ka Jylla ba kan pyndep ia ka jingpynrung bad pyniasoh ia baroh ki nongioh jingmyntoi lyngba ka Supplementary Nutrition Programme (SNP) lyngba u Aadhaar bad eKYC bad Facial Recognition System (FRS).

Ha ka shithi sha ka Myntri ka Women and Child Development ka Annapurna Devi, u Conrad u la ong, “Ka jingsdang ban pynrung ia ka eKYC bad ka jingshim ia ka jingithuh ia ka durkhmat ne facial recognition system (FRS) ka la dep iaid shakhmat. Kumta ruh nga kyrpad ban ai por ia ngi sa hynriew bnai ba ngin lah ban pyrnung bad pyniasoh ia ki nongioh jingmyntoi lyngba ka Aadhaar bad eKYC bad FRS ki ban long ka jingiarap kaba khraw ban pynioh na ka bynta ka jylla.”

“Nga kyrpad ruh ba lada long ban ailad ia ka jylla ban lah ban buh kynthup lang ia baroh ki nongioh jingmyntoi MPR jong ngi kiba la register ba kin pynrung kyrteng ha ka SNP kat haduh katei ka por,” u la bynrap.

Haba kdew halor ki jingeh kiba ka jylla ka iakynduh ha kaba iadei bad ka Supplementary Nutrition Programme, u CM u la ong ba katkum ka MPR data, ka jylla ka don haduh 5,85,254 ngut ki nongioh jingmyntoi, hynrei hapoh ka POSAHN TRAKER ki don tang 4,00,572 ngut kiba dei ki nongioh jingmyntoi ba la register hapoh ka POSHAN 2.0. Kane ka mut ba haduh 1,84,682 ngut ki nongioh jingmyntoi ki la shah iehnoh.

Nalor kata u CM u la pyntip ruh ba ka sorkar jylla ka la bteng banpyrshang borbah ha kaba iadei bad ka jingpynrung Aadhaar bad ka jingpynmih ia kine ki nongioh jingmyntoi. Ka jingthied ia ki smartphone naka bynta ki nongtrei Anganwadi ka la poi sha ka bynta kaba khatduh ban pyndep,” u la ong.

Haba aikhublei ia ka ministry halor ka jingtrei borbah jong ka naka bynta ka bha ka miat jong ki kynthei bad khynnah, u Conrad u la ong ba ka Meghalaya ryngkat bad ka Early Childhood Development Mission ruh ki don ia ka jingthmu ban kyntiew ia ka bha ka miat jong ki khynnah naduh ba dang kha haduh ba kin da kynjoh sha ka 8 snem rta.