Pan map u MLA Mowkaiaw na u paid Khappud bym lah wanrah ïaka Police Outpost ha Psiar

Syllad | The Rising MeghalayaSeptember 18, 2019

JOWAI: U MLA jong ka Mowkaiaw Ma Nujorki Sungoh ula pan map na u paidbah nongshong shnong khappud bym lah ban wanrah ïaka Police Outpost haka shnong Psiar haka sngi ba Ar haka jingrakhe ïaka jubili rupa jong ka Psiar Upper Primary School bad ka jingbuh maw nongrim iaka Psiar Secondary School.

U Ma Nujorki ula ong ba hadien ka jingshah pyndik ki paid khappud na ka por sha por ha ki briew sorkar bad pulit jong ka Assam la dawa ban buh ïaka Police Outpost ha Psiar bad ka file halor kane ka outpost ka don ha kti jong u Myntri Kam Pohïing ka sorkar Jylla, hynrei namar ka don ka jingïakren hapdeng ka sorkar Assam bad ka Meghalaya ki paidbah kin hap ban ïaishah halor kane ka kam.

Wat la u ma Nujorki um lah ban wanrah iaka Police Out Post ha Psiar, dangshen ki paidbah bad ki nongialam shnong kila mynjur ban buh noh ïaka battalion camp ha Tihwieh.

Ula ong ba kum nongmihkhmat u ïohi ïaka jingeh u paidbah kiba shong ha khappud, hynrei ban wanrah ïaki kam pynroi mynta mynta ym lah, katba ha u snem ban wan kyrmen ba lah ban pynurlong ïaki katto katne ki jingangnud u paidbah.

U MLA ula ong ba shimkhia bha ban peit bad pynbha ïaka pule ka puthi bad shen yn thung nonghikai sha katei ka thain, nalor ban pynbha ïaki jaka ai jingsumar ha ha kaba ïaka Psiar Sub-Centre ruh yn pynkylla noh sha ka Health & Wellness Centre bad ha kane ka jaka sumar yn pynbiang lut baroh ki dawai dashin bad ki doctor ki nurse.

“Ïa ka surok na Sahsniang sha Tiehwieh ban kham pynsuk ïaki nongshong shnong ha khappud ruh yn sdang shna noh shen,” la ong u ma Nujorki bad ula ong ba u Chief Minister bad u Deputy Chief Minister ka Jylla kila ai jingkular na ka bynta ban shna surok na Khatkasla shaduh Mowjem lyngba ka skim North Eastern Council bad lada ym don kino kino ki jingpynwit pynthud na kino kino ki bor ia kane ka surok ruh yn shna ban suk u paidbah.

Ha kane ka jingrakhe jubili rupa ka Psiar Upper Primary School bad ka jingbuh maw nongrim ïaka Psiar Secondary School la long kongsan da u ma Ma Comingone Ymbon, Myntri ka tnad Fisheries bad kiwei kiwei.

Nalor u ma Comingone Ymbon la ïadonlang u CEM JHADC u ma Thombor Shiwat, MLA ka Jowai u Wailadmiki Shylla bad kiwei kiwei ki MDC bad ka kong Phidalia Toi Political Adviser NPP State President, u BDO Laskein C&RD u bah F Basan bad kiwei kiwei.

U Ma Comingone Ymbon ula ïaroh ïaka jingiaid lynti jong kane ka skul sha u mawmer ba 25 snem. Ula khublei ïaki nongseng kane ka skul da ka jingïatreilang ki shnong khappud bad ka JAC-JH ban sam jingnang jingstad sha khynnah kiba wan na ki longïing kiba duk bad ula kitbok kitriwiang ba kane ka skul kan kiew shaphrang na uwei u snem sha u wei pat.

Ha kane ka sngi ki nongialam shnong bad ki synjuk nongialam shnong kila ai dorkhat ha u ma Comingone Ymbon ban pynpoi sha u Myntri Rangbah ka Jylla uba bym shym la lah ban wan iuhkjat ha katei ka shnong.

Kiba bun ki mat jingdawa jong ki shnong ki dei ban pynbha iaka surok, u shabi jong ka roi ka par, ka skul, ka umbam umdih, ki jaka ialehkai, ban pynbha iaka koit ka khiah bad kiwei kiwei.