Pan jingshai ka Kong Ampareen halor ka jingkhlad u samla hapoh NEIGRIHMS

Syllad | The Rising MeghalayaJuly 24, 2023

Ka Myntri ka Tnat ka Koit ka Khiah ka sorkar Jylla, ka Kong Ampareen Lyngdoh haka sngi Nyngkong ka la pan ia ka kaiphot na ki bor pyniaid ka NEIGRIHMS ha kaba iadei bad ka jingkhlad noh jong uwei u samla na ka jingmynsaw.

Haba kren sha ki lad pathai khubor, ka Kong Ampareen ka la pynpaw ba ka la pan ia ka kaiphot jingpynshai halor kane ka jingjia.Ka la ong ruh ba ka la phah da ka shithi sha u Director, NEIGRIHMS khnang ban sngewthuh shai ha kaba iadei bad katei ka jingjia. Ha ka juh ka por ka la phah ruh ka jingsngewlem sha kiba haiing hasem jong utei u lanot uba la khlad noh.

Lah ban kdew ba ha ka sngi U Blei ba la lah ka la mih ka jinghuri hura hapoh NEIGRIHMS hadien ba uwei u samla u la khlad noh na ka jingmynsaw hadien ka jingjia tyngkhuh kali ha ka thain Umiam ha ka step Sngi U Blei ba la lah.

Na ka liang kiba haiing hasem jong une u samla ki la kynnoh ba kane ka hospital kam shym la shim khia halor kane ka jingjia bad ba ym shym la don doktor hapoh kane ka hospital ban aijingsumar ia u wat hadien haduh jan san kynta.

Katei ka jingjia tyngkhuh kali ka la jia ha ki thain Umiam katba une u samla u dang niah da ka scooty hadien ba ka la iatyngkhuh bad kawei ka kali Mahindra Thar kaba wan marpyrshah kaba la pynlong ia u ba un ngat ha ka jingmynsaw kaba jur.

Haba buh jingkylli, na ka liang katei ka Myntri sorkar ka la ong ruh ba kam shym aibor satia na ka bynta ban pynlong ia kano kano ka jingtohkit halor katei ka jingjia, kata da kaba ong ba ka NEIGRIHMS ka dei ka tnat jong ka sorkar pdeng, hynrei ka dei ka jingkitkhlieh jong ka sorkar Meghalaya ban peit ban khmih ia ka.

Ka la iathuh ruh ba ka la bthah ia u Director ka NEIGRIHMS ban ai ka jingpynshai kaba bniah halor katei ka jingjia.