Pan jingshai ka JSM na ka bor synshar district WJH halor ka ktem pulit ka Assam ha Saba

Syllad | The Rising MeghalayaJune 15, 2021

Ka Jaintia Students’ Movement (JSM) ka la ai por haduh ka 21 tarik ïaka sorkar Jylla ban pynshai paidbah halor ka jingshna Border Police Outpost ka sorkar Assam ha Saba, West Jaintia Hills

Ka JSM kala ai da ka jingthoh lyngba u Deputy Commissioner West Jaintia bad sha u Superintendent of Police West Jaintia haka jingïakynduh haka sngi ba Ar ban dawa pynshai paidbah halor ka jingtei ktem Pulit ka Assam kaba la plie paidbah haka 12 tarik une u bnai da u MLA Rupsing Teron, MLA Boithalangso LAC.

Ka JSM ka la pynkynmaw ba kawei ka battalion camp kaba ka Assam ka la dep shna kadei ha Saitsama ha u snem 2019 bad sngewsih ba ka District West Jaintia kam shym lah ban pynsangeh.

Ka sorkar Assam kala plie paidbah iaka ktem Pulit ha Saba

Ka JSM kala kynnoh ba jingbymshimkhia ka sorkar bad ka bor District West Jaintia Hills, ban ïada ïaka khyndew ka shyiap bun ki jaka jong ki trai ri trai muluk sa shah knieh jubor.

Ka JSM kala dawa ruh naka sorkar ban shna ïaka Border Out post ha Saba kumba shna ka Assam.

“Ka JSM ka ai khublei iaka Sorkar Meghalaya bad ka District Administration, West Jaintia Hills kaba la ai jingkular thok ha ka 26/4/2021 ba yn pynsangeh noh ia ka jingshna jong ka BOP Assam ha ka shnong Saba,” la ong president ka JSM u Leningstar Rymbai

“Ka jingshna jong ka BOP Assam ka ladep mynta ba ka burom baroh ka leit ka Sorkar Meghalaya bad ka District Administration WJHD kiba la ailad ia ka Assam.

Ka long ka jingshisha ba ka Sorkar Assam ka la pyrshang ban shna outpost ha Mukroh bad Khatkasla hynrei na ka daw ka jingpyrshah jong ki paidbah ka Sorkar Meghalaya ka hap ban tuklar hynrei mynta ka kynti ka Sorkar Assam ka la jop,” la ong une u nongialam ka JSM