Pan jingïarap pisa u Kamphereiei Pala na ka Officers’ Club ban pule doktor

Syllad | The Rising MeghalayaMay 12, 2019

JOWAI: U Kamphereiei Pala, u samla pule jong ka North Liberty Higher Secondary School uba la wanrah ka nam ka burom jong ka skul, ka ïing ka sem, ka shnong bad ka Rilum Jaiñtia baroh kawei hadien ba pass bha bad wan haka kyrdan kaba phra haka First Ten Position jong ka result HSSLC (Science) kaba pynbna dangshen da MBoSE ula leit mih dalade sha u secretary Officers’ Club ban kyrpad jingïarap pisa na ka bynta ban u ïoh ban bteng jingpule kaba u angnud ban long u doktor.

U Kamphereiei Pala udei u khun u Ma Jaesar Pashiang bad ka Kong  Kratis Pala kiba na ka shnong Moolamylliang, East Jaiñtia Hills District. Kane kan longïing ka dei kaba im da kaba bylla dewiong.

U Secretary Officers’ Club Ma Paul Synnah, u la ong ba u Kamphereiei ula wanmih sha ka jaka treikam jong u ban kyrpad ban ïarap ïa ka Officers’ Club ban kyrshan na ka bynta ba un ïoh ban bteng ïaka jingpule doktor.  U Ma Synnah, ula ong ruh ïa u ba ula pyntip sha baroh ki Officers’ lyngba ka whatsapp group jong ki bad baroh ki officer kila pynpaw ka jingkloi ban ïarap ïa u Kamphereiei Pala ban urlong ka jingthmu bad ka jingangnud jong u.

Ka Officers’ Club kala dep ban ïarap ïaki arngut ki samla pule ka District kiba angnud ban pule doktor bad mynta ka kynti ruh kin ïarap ïa une u samla bad la kitbok kitrwiang ba ka jingthmu bad ka jingangnud jong u kan urlong.