Pan jaka ka sorkar na ka Assam ban tei ia ka Meghalaya House bathymmai

Syllad | The Rising MeghalayaFebruary 22, 2024

U Myntri Rangbah ka Jylla, u Conrad K Sangma haka 22 tarik Rymphang, u la pyntip hapoh ka iingdorbar thawain ba na ka liang ka sorkar ka la kyrpad ia ka sorkar Assam ban pynioh jaka na ka bynta ban tei ia ka Meghalaya House kaba thymmai ha ka nongbah Guwahati.

Nalor kata u la pynbna ruh halor ka rai jong ka sorkar ban buh ia ka guest house hapoh Khanapara, Ri Bhoi district.

Haba jubab bynrap ia ka jingkylli, u CM u la ong, “Nga la iakynduh dang shen ia u CM ka Assam, Nga la rah ia kane ka mat halor ka jingpynioh ia ka jaka kaba biang na ka liang ka Assam bad ioh ia ka jubab kaba sngewtynnad. Ngi la bteng ban buddien bad ngi kyrmen ban ioh ia kane ka jaka namar na ka liang ka jong ngi, ngi la shim ia ki sienjam  ban iathir bniah halor kane ka bynta.”

U la pyntip ruh ba ka Tnat Tourism ka la thied ruh katto katne ka jaka hapoh Khanapara bad ka jingtyrwa ka la iaid shakhmat na ka bynta ban tei ia ka guest house, ia kaba lah ruh ban pyndonkam ha kiba bun ki bynta.

“Ka tnat Tourism kan sdang ban shim ia ki sienjam ban pynkhreh na ka bynta ban tei noh ia kane ka guest house ha Khanapara,” bynrap u Conrad.   

Kham hashwa, u nongialam liang pyrshah u Bah Ronnie V Lyngdoh u la kyntu ia ka sorkar jylla ba kan shim ia ki sienjam na ka bynta ban kyntiew ia ka jingdon jong ki kamra na ka bynta ki artylli ki Meghalaya hapoh Guwahati bad Vellore khnang ban weng ia ki jingeh kaba kum ki samla pule bad nongshong shnong na ka jylla ki iakynduh.

U la ong ruh ba ka jingioh ia ka bai wai ka long kaba rem bad kumta lada ka sorkar kan lah ban kyntiew ia ka jingdon jong ki kamra khnang kan ym ban khia palat ia ki briew kiba dei napoh ka jylla.

Kumjuh u nongmihkhmat ka VPP na Mawlai u Bah Brightstarwell Marbaniang ruh u la pynpaw ba u kwah ban ioh jingtip lada ka sorkar ka don ne em ia kano kano ka jingthmu na ka bynta ban pynioh da ki jingtei kiba kham biang ha Guwahati bad Vellore namar ka jinglong jingman jong kine ki artylli ki Meghalaya House namar kiba bun ki nongshong shnong na ka jylla ki dei kiba ju leit khah khah sha kine ki artylli ki jylla na ka bynta ki lad jingsumar.

Haba jubab ia kane, u Myntri ka GAD, u Rakkam A Sangma u la ong ba kane ka kam ka la don hapdeng ka jingbisahr bniah.