Palat 8.5 lak tylli ki account Pradhan Mantri Jan Dhan Yojana la plie ha ka Jylla

Syllad | The Rising MeghalayaMarch 1, 2025

Haduh palat 8.5 lak tylli ki Pradhan Mantri Jan Dhan Yojana account la dep ban plie ha ka Jylla Meghalaya.

“Haduh jan kumba T.186 klur la dep ban mang hapoh ka MUDRA (PMMY) loan ka ban aijingmyntoi ia palat 14,000 ngut ki briew,” ong u Lat ka Jylla u CH Vijayashankar haba kren ha ka Dorbar Mang Tyngka ka Jylla ha ka 28 tarik Rymphang.

Katkum ka jingpynpaw ka jong u, u Lat u la ong ba ka Jylla ka la trei khlem shongthait na ka bynta ban pynjanai halor ki jingpynioh ia ki lad jingiarap pisa na ka bynta ki jingmyntoi jong ki nongshong shnong ka Jylla.

Nalor kata, ka sorkar ha ryngkat ka jingiatreilang bad ka Meghalaya Rural Bank ki la pynkhreh ruh ban wanrah ia ka MICRO ATM technology. Kine ki Micro ATM ki ailad ia ki paidbah ba kin pyndonkam ia ki kor ha la ki jong ki ktien ba ki pyndonkam, kata ha ka ktien Khasi, Pnar bad Garo na ka bynta ban sei lane ban thep pisa.

U Lat u pyntip ruh ba ka GSDP ka Meghalaya na ka bynta une u snem mang tyngka ba mynta la khmih lynti ba kan kot sha ka T.59,228 klur, kata ka ban tam da 11.6% haba ia nujor bad u snem ba la dep.