Palat 5,32,297 tylli longiing ki la ioh kor um ha iing na ka JJM

Syllad | The Rising MeghalayaMarch 13, 2025

Haduh palat 5,32,297 tylli ki longiing ki la ioh ia ki kor um ha la ki jong ki iing ki sem lyngba ka skhim Jal Jeevan Mission (JJM).

Ia kane la pyntip da u Myntri ka Tnad PHE u Marcuise N Marak ha ka jubab ba la wanrah hapoh ka iingdorbar Thaw Ain haka 12 tarik Lber.

“Ka Tnad ka la lah ban pyndep haduh kumba 81.78 percent na baroh ka thong kaba la buh ban pyndep,” bynrap u Myntri.

U la pyntip ruh ba haduh 8 na ki 10 tylli ki skhim JJM la lah ban pyntreikam ha Mawlai bad ba jingpyntrei ia ki artylli kiba sah ka dang iaid shakhmat.

Ki phra tylli ki skhim ba la dep pyntreikam ki kynthup ia ka Umsaw Mawtawar Water Supply Scheme (WSS), ka Mawkynroh Umshing WSS, ka jingpynheh iaka Mawsiatkhnam WSS, Madan Mawkhar WSS, pynkylla thymmai iaka skim um Umphrew WSS bad ka Umrynjah WSS.

U Myntri u pyntip ba ki artylli ki skhim kiba dang iaid shakhmat ka jingpyntrei ki kynthup ia ka Mawtawar WSS bad ka Umshillong Lummawnei, Umthlong, Mawiong bad Block-13 WSS.