Palat 3332 tylli ki skul SSA kiba la kloi ban aiti pyniaid noh sha ka Sorkar Jylla

Syllad | The Rising MeghalayaAugust 28, 2025

Palat 3332 tylli ki skul SSA kiba kynthup ia ki Lower Primary bad Upper Primary ki la pynpaw ia ka jinglong la kloi ban aiti noh ia ka bor pyniaid sha ka sorkar Jylla, katba na ka liang ka Tnad Education ka la rai ban sa aiti noh shen ia ka jingtyrwa ia ka tulop (pay scale) sha palat 14000 ngut ki nonghikai SSA ha ka jylla.

Ia kane la pyntip da u president ka Meghalaya SSA Schools Association (MSSASA) u Bah Aristotle C Rymbai hadien ka jingiashim bynta ha ka jingialang ba la khot pynlong da u Commissioner & Secretary ba khmih ia ka Tnad Education u Vijay Kumar Mantri ha ka 27 tarik Nailar.

Haba kren sha ki lad pathai khubor hadien ka jingialang, u Bah Rymbai u la ong ba ka Tnad ka la ai ia ka jingbatai kaba bniah halor ki saw tylli ki mat ba kongsan, kaba kynthup ia ka jingshimti ia ki skul SSA ba la long trai da ki riew shimet, ka tulop (pay scale) ia ki nonghikai SSA, ka jingpynshong nongrim ia ki skul SSA bad skul Sorkar bad ka Cabinet Memorandum na ka bynta ka jingaiti noh ia ka jingpyniaid ia ki skul.

“Ka Tnad ka la ioh pdiang NOC na ki 3332 napdeng ki 5131 tylli ki skul SSA kaba pynpaw ia ka jinglong la kloi ka jong ki ban aiti noh ia ka bor pyniaid sha ka sorkar jylla,” u la bynrap.

“Na kine, 3034 tylli ki dei ki skul SSA ba la pyniaid da ki shnong bad 298 tylli ba la pyniaid da ki kynhun Balang bad ki riew shimet,”  u la bynrap.

Ha kaba iadei bad ka jingdaw jong ka seng, u Bah Aristotle u la ong, “Ngi sngewkmen ban iohsngew na u Commissioner & Secretary ba ka jingtyrwa ia ka tulop (pay scale) na ka bynta ki nonghikai SSA la pynkhreh bad ia kaba yn sa phah sha ka Tnad Finance bad sha ka Kynhun Myntri na ka bynta ban ai ia ka jingmynjur hadien ka Dorbar Synrai ka ban wan jong ka Iingdorbar thaw ain.”

“Ka Tnad ka la ai ruh ia ka jingbatai halor ka cabinet memorandum halor ka jingshimti ia kito ki skul SSA kiba la dep ban aiti ia ka jinglong lakloi jong ki ban aiti noh ia ka bor pyniaid sha ka sorkar. Ia kane ka cabinet memorandum yn sa phah sha ka Kynhun Myntri hadien ka Dorbar Synrai ka ban wan,” u la bynrap.

U Bah Aristotle u la pyntip ruh ba ka Tnad ka la sdang ia ka kam ban pynshong nongrim ia ki skul SSA bad skul Sorkar, ban rah noh ia ki nonghikai na ki skul kiba don tang hapoh 10 ngut ki khynnah sha ki skul ba don bun ki khynnah.

Ula iathuh ruh ba u Commissioner & Secretary ula kular ba ka rukom phah ia ka tulop ba mynta kan dang iai bteng bad ia ka tulop ki nonghikai SSA yn sa phah beit beit sha ki Account jong ki.

Nalor kata u la ong ruh ba ka MSSASA ka khmih lynti ba kan nangioh shuh shuh ia ki jingtip halor ka pay scale hadien ba la pyllait ia ka kaiphot jong ka 16th Finance Commission, ia kaba la khmih lynti ha ka taiew ba khatduh jong u bnai Risaw.