Duna 300 ngut ki longkmie ba armet ioh myntoi na ka ANC Health Camp ha Amlarem

Syllad | The Rising MeghalayaJune 25, 2025

Duna 300 ngut ki longkmie kiba dang pun khun napoh ka thain Amlarem Block, ki la ïoh jingmyntoi naka Special Antenatal Care (ANC) Health Camp kaba ai kyrpang iaka jingsumar iaki longkmie hashwa ban kha khun.

Ia kane ka Health Camp, la pynlong da ka Amlarem Aspirational Block Programme (Health Dept, ICDS Dept bad C&RD Dept) ryngkat ka jingiatreilang ka Directorate of Health Services (MCH&FW) bad la kyrshan da ka Meghalaya Health Strengthening Project (MHSSP).

Iaka jingialang kaba la pynlong ha Hall Syiem Jingsuk Cathedral, Amlarem la donlang ruh u Chief Adviser ka sorkar Jylla bad MLA ka thain Ma Lahkmen Rymbui kum u kongsan, ka Directorate of Health Services MCH&FW ka Dr N. Kharsahnoh, ka SDO Civil Amlarem Civil Sub-Division A. Raajsshre, u BDO ka Amlarem Dr D. Lyngdoh, ki doktor nalor kiwei kiwei ki riew rangbah ka thain.

Ha kane ka jingialang ki doktor kiba peit kyrpang iaki kynthei, ki la pynlong ka jingpeit bniah lane Spot OPD screening ha katei hi ka jaka, ka jingleh Ultrasound iaki longkmie kiba dang punkhun kumjuh ki jingai jingmut kiba donkam halor ka koit ka khiah jong ki longkmie da kaba pynthikna ba ki longkmie armet kin ioh iaki jingdonkam kum ka jingbam, ka jingsumar shwa ban kha khun bad ki jingeh kiba ju jia haka jingkha khun.

Ka Directorate of Health Services MCH & FW ka Dr N. Kharsahnoh haka jingkren kala pynpaw iaka jingdonkam ka Ante natal check-up khamtam lai bnai haka por ba pun nyngkong ia I khunlung. Kala pynshlur ruh ia baroh ki longkmie kiba dang pun khun ban pynrung kyrteng naka bynta ka jingsumar ANC bad ban shim kabu iaki jingshakri ba la ai da ka tnad ka koit ka khiah.

Ka jingsumar shwa ban kha khun kaba kynthup ïaki jingpeit bniah man ka por bad ka jingtest shwa ban kha khun, ka long kaba donkm bha na ka bynta ban buddien iaka koit ka khiah jong ka kmie bad ia u khunlung, kala bynrap.

Ka la ai khublei ruh iaka jingtrei jong ki ASHA bad pynshlur ia ki kmie kiba dangpun khun ban iatreilang bad ki ban pynthikna iaka jinglah ban ioh iaki jingshakri jong ka ANC.

U Ma Lahkmen Rymbui haka jingkren ula pyrto iaki kam kiba ka sorkar Jylla hapoh ka jingialam u Conrad K. Sangma kala la leh naka bynta ka koit ka khiah jong ki nongshong shnong khamtam ki longkmie kynthup naduh ka jingwanrah iaka State Health Policy, ka jingpynbiang iaka Transit home ne ka jaka sah shipor ban pynioh jingsumar iaki longkmie kiba sah haki jaka ba jngai, ka jingwanrah iaka Early Child Development Mission na ka bynta ban peit ia i khunlung ynda la kha haduh ban dap lai snem bad ruh shibun ki prokram bad skhim na ka bynta ka jingmyntoi jong ki nongshong shnong.

Haba iadei bad ka Megha Health Insurance Scheme (MHIS) ne Smart Card kaba ai jingmyntoi iaki paidbah ha kaba siew lang ïaka bailut baisep haba leit shah sumar sukher ha ki Hospital khamtam ïaki briew kiba duk, u Ma Lahkmen Rymbui ula pynpaw ruh ka jingsngew diaw namar haduh mynta dang bun kiba kyntait ban leh ia u Aadhaar ban pynïasoh bad ka MHIS Card.

‘Ymdon Ma, ymdon woh, ymdon MLA palat ban iaka Smart Card’ la ong u Ma Lahkmen bad kum u nongmihkhmat ka thain u pynpaw ruh ka jingsngewsih namar da ki phew ngut ki nongshong shnong jong ka Amlarem Constituency haka shi taiew ki iakynduh MLA ba ki shem jingeh ban siew iaki bai hospital bad ha kajuh ka por ula pynshlur ruh ban pynrung kyrteng Aadhaar noh ïalade kham kloi khnang ba kin ym duh iaki jingmyntoi bapher bapher ba la ai da ka Sorkar India.

U MLA ula pynkynmaw ruh iaki longkmie halor ka jingma jong ka jingshong kha khynnah, da kaba u kyntu ban long ki nongrah khubor shaki shnong ki thaw ki jong ki ban sneng ban kraw iaki khun samla ba kin kiar na ka jingshong kha khynnah namar ymtang ba ka ap jingma iaka koit ka khiah ka jong ki hynrei ka long ruh kaba beain.

Ula kyntu ruh iaki longkmie bn sumar ialade bad ia u khunlung ban dangkha khnang ba ka iing ka sem kan long kaba koit ba khiah namar kadei ka spah bah.

Shwa kane u Dr A. Khonglah SDM&HO cum BMO Amlarem, ula pyntip ba hapoh ka Amlarem la don 15 ki jaka sumar kynthup ki CHC, PHC bad Sub Health Centre. Ka ka jingpynrung kyrteng haka ANC ka long 53% bad ki longkmie kiba kha khun haki jaka sumar ka long 73%.

Ha kane ka jingialang la pynkup burom ruh iaki jaka sumar kiba la ioh iaka jingithuh na ka NQAS ba kynthup ka Mupyut Health & Wellness Centre, Khonglah Health & Wellness Centre bad Syndai Health & Wellness Centre. San ngut ki ASHA kiba la trei shitom haka por ka jingpynrung kyrteng ANC, ki SHG nalor kiwei.