Palat 100 ngut ki nonghikai kin ioh jinghikai kum ki counsellor ha ka jingiakhun pyrshah drok: Paul

Syllad | The Rising MeghalayaMay 10, 2025

U Myntri ka Tnad Social Welfare u Bah Paul Lyngdoh haka sngi Thohdieng u la pynbna ba haduh palat 100 ngut ki nonghikai ki la pynkhreh ban ioh pdiang ia ki jinghikai ban long ki counsellor tang hapoh ka shiphew bnai na ka bynta ban weng ia ki jingeh bad ki jingma na u drok na ka jingim jong ki khynnah pule naduh ba ki dang rit.

Haba kren sha ki lad pathai khubor, u Bah Paul u la ong ba ka sorkar lyngba ka tnad Social Welfare ka la shim ia baroh ki sienjam ban tehlakam bad ban pynduhjait ia u drok bad ia ki kam khaii drok na ka Jylla Meghalaya.

“Ngi la shim ia kiba buntylli ki lad ki lynti kiba la sei mynta ia u soh kumba nga la pynpaw sha phi ha ka sien kaba la dep ba ka jingdon jong kiba kyrni ha u drok ka la hiar sha ka 20 percent, hynrei kane kam mut ba ngin shongthait noh lyngba kane ka jingjop,” u la bynrap.

Haba pynpaw ba ka tnad ka kut jingmut skhem ban pynkhlain shuh shuh ia ki sienjam ban tehlakam ia ka jingjyllei jong u drok, une u Myntri u la ong, “Kawei na ki sienjam kaba kongsan kaba ngi la pyntreikam mynta ka long ba ngin sdang ia ki lad ki lynti ban weng ia kane ka jingma naduh naduh ka rta kaba dang rit, kata ka mut ngin ym shah bad ngin shim ia ki lad ki lynti ban khanglad ia ki khynnah kiba dang khie samla ba kin shah khring ban ngop ha ki  jingdih drok.”

U la ong ruh,” Halor kane ka DREAM Mission dang shen ka la iatreilang bad ka Sanker Centre for Neurology and Mental Health, hynrei ngin ym shim ia ki lad jinghikai ba la ai da ka Sanker, ha kaba ki nonghikai kin ioh ia ki jinghikai ha ki kam iasyllok na ka bynta ki khynnah pule naduh ka klas II haduh klas V khnang ba ki khynnah kin lah ban kiar na une u jingdih ba shyrkhei.”

Nalor kata u la pynbna ruh ba ka sorkar jylla kan bei haduh 50 percent ka jingpynlut na ka bynta kane ka jingpule kaba long T.10,000 bad ong, “Kata ka dei ka sienjam kaba khraw kaba ka sorkar ka la bei tyngka na ka bynta ki nonghikai ki ban long kum ki nongiasyllok namar ngin ym lah ban lumlang shi jaka ia baroh ki khynnah skul, kumta ngin aijinghikai ia ki nonghikai ki ban long ki nongiasyllok ha la ki jong ki skul.”

U Myntri u pyntip ruh ba kawei pat ka sienjam ka long ba kawei na ki club ialehkai football ba pawkhmat, ka Shillong Lajong FC ka la iatreilang bad ka tnad na ka bynta ban ialap pyrshah halor ki jingleh niewbein ia kiba dih drok bad ruh ban pyniajan sha ki samla.

“Ngi don ruh ka jingiajan bad ki jaka aijinghikai kiba iadei bad ka nongrim jong ka jingngeit, kumjuh bad ka Meghalaya Users Forum kiba ju iasyllok bad u mission director jong ngi kumjuh bad ki nongialam shnong, ki seng samla, seng treimon sngewbha kiba la iakynduh khah khah ia u mission director ban iasyllok halor kane ka bynta,” u la ong.

Kawei pat ka bala shim ka long ba ka tnad ka la phaikhmat bha ruh ha kaba iadei bad ki jingai jinghikai lyngba ki Vocational & Skill Development.

“Ngi la shem ba kane ka buit ka long kaba seisoh ban khing ia kito kiba la ngop ha u drok. Kumta ki jingai jinghikai ki la iaid ha New Hope Deaddiction Centre, kata na ka bynta ki shynrang bad kynthei. Ngi la iatreilang ruh bad ka MSSDS, Don Bosco, ITIs bad ngi tyrwa ruh ia ki jingai jinghikai ha ka kam plumber, food processing, mobile repair, bad photography,” bynrap u Bah Paul.

Katba na ka liang u Director ka DREAM u Bah Francis Kharshiing u la ong ba la pynshlur ia ki skul ba kin jied ia iwei na ki nonghikai ban ioh jinghikai ban long ki Counsellor.

“Kane ka course ka long tang na ka bynta 10 ngut ki nonghikai na ka bynta shi bnai. Yn sa nangkyntiew. Ha ki 10 bnai ngin aijinghikai ia palat 100 ngut ki nonghikai. Ka jingthmu hi ka long ba kine ki nonghikai ba la ioh jingpyntbit kin lah ban khring ia ki khynnah sha kaba bha,” u la ong.