Nguh Blei ka Dulong ban iada na ka jingpang khlam COVID-19

Syllad | The Rising MeghalayaMay 17, 2020

Ka Dorbar Shnong Dulong, Jowai kala pynlong iaka jingduwai kyrpang ban kyrpad na u nongbuh nongthaw ban iada na ka khlam #COVID_19, ka khlam jingpang kaba la sar ha kylleng ki ri ka pyrthei bad ka kumjuh ka jylla Meghalaya.

Ia kane ka jingduwai la pynlong mynta ka step Sngi U Blei ha ïungwalieh ka dorbar shnong Dulong, Jowai hapoh ka jingialam khmat u Dolloi ka Elaka Jowai Puramon Kynjing, uba long u nongshong shnong ka Dulong.

Ha shuwa ban pynlong ka jingduwai la ioh ka jingkren lyngkot na u Waheh Shnong ka Dorbar shnong Dulong, u Ma Miki Bareh haka jingiadonlang ki riew rangbah ka shnong naduh u ma Kmen Lato bad kiwei kiwei.

La pynlong ruh iaka jingsngap kaba jar jar ban pynpaw ka jingsngewlem ia ki longiing jong kito ki iing kiba la khlad na kane ka khlam.

Kane ka jingduwai ka ka dei ban kyrpad kyrpon na ki blei ki syiem ban sumar iaki khun ka roit ka jadibynriew bad ka ri bad ka pyrthei baroh kawei ban ioh iaka jingkoit ka jingkhiah bad ban iakhun ia kane ka khlam katkum ki jingbthah ka tnad ka koit ka khiah, lyngba ka WHO.

La kitbok kitrwiang ruh ia baroh kiba wan na ki jaka bapher bapher kiba sahkut ha ka lockdown kaba la pynjari ka sorkar India ban iakhun iaka khlam ban kin ioh ka met kaba koit kaba khiah bad ai khublei iakai doktor, nurse, ki chipai, ki pulit bad kiwei kiwei kiba mih hakhmat eh ban iakhun ban tem ia kane ka khlam.