Ngin ym shah da lei lei ruh ban pynkynriah jubor ia ki nongdie madan na Khyndailad: MGSPHSVA

Syllad | The Rising MeghalayaJune 30, 2025

Ka seng jong ki nongdie madan, ka Meghalaya and Greater Shillong Progressive Hawkers and Streek Vendors Association (MGSPHSVA) ka la ong ba kan ym shah da lei lei ruh ban weng ne pynkynriah jubor ia ki nongdie madan na Khyndailad katba ka Municipal bad ka Tnad Urban kim pat lah ban pynbeit shuwa ia ki kynrum kynram bad ban pyndam shuwa ia ki Licence kiba ki la ai sha ki briew ki bym dei ki nongdie madan.

U kyrwoh bala phah lyngba u Bah Shane Thabah, General Secretary ka pynpaw bad pynkynmaw ba naduh ka snem 2016 ka la ȉakhun ban pyntreikam ia ka aiñ Street Vendors (Protection of Livelihood and Regulation) Act 2014, bad ba ka angnud ba ia kane ka aiñ dei ban pyntreikam thik pa thik katkum ki kyndon bad ki rule.

Kumta hadien ba ka Meghalaya High Court ka la ai ia ka rai ba khatduh bad bthah ia ka Sorkar Meghalaya ban pyntreikam ia ka Aiǹ ha ka snem 2022, ka seng ki nongdie madan ka MGSPHSVA ka la ȉatreikam lang bad ki bor ne tnat sorkar na ka bynta ban iada ia ki hok jong ki nongdie madan katkum ka ain.

Ka jingiashim bynta jong ka seng MGSPHSVA ha ka Provisional Town Vending Committee ka long kaba shai kdar ba kane ka jingpynbeit kam pat dei kaba kut, hynrei ka dei tang ka jingpynkhreh lypa haduh kata ka sngi ba ka Sorkar kan thaw ia ka Town Vending Committee kaba pura ka ban sa trei ia ka kam ban jurip bniah ia ki ȉew tynrai, ki iew long hi, nangta kan kheiǹ jingkheiǹ katno ngut ki nongdie madan kin shong die jingdie katkum ka jingdon briew bad kan kdew ia ki jaka ba kin shong die jingdie bad kiwei kiwei de ki kam ba la pruid dak ha ka aiñ.

Na ka por sha ka por ka Seng ka la ju phah ia ki jingujor ban kdew ia ki jingduna bad jingdkoh ha ka jingtreikam jong ka Provisional Town Vending Committee (PTVC). Kum ka nuksa, ka PTVC kam shym lah ban pyntreikam ia ka Digital Survey kaba la khmih lynti ban pyntreikam katkum ka juk stad technology khnang ban wanrah ia ka jingkhuid bad jingsuba ha ka jingpyntreikam ia ka Aiǹ.

Ka Seng ka la pynpaw ruh ia ka jingpyrshah kaba jur halor ka jingleh donbor bad ka jingshim rai marwei ka Municipal bad tnat Urban ha kaba thaw ia ki jaka shong jong ki nongdie madan ha ka bynta ba shapoh jong ka MUDA parking lot bad ha pyrshah ka SBI, khlem da wanrah ha ka meeting jong ka PTVC bad khlem ka jingȉamynjur lang jong ki dkhot jong ka PTVC. Kane ka jingrai marwei jong ka Municipal bad tnat Urban ka long ka jingleh be-aiǹ.

Ka MGSPHSVA kam don kano kano ka jingthmu ban pynthut ne pynwit ia ka jingpyntreikam ia ka aiñ. Hynrei ka angnud hir hir ba ka aiñ kan treikam bad ba yn lah ban pynbeit ia ka kam jong ki nongdie madan kaba la sah teng mynta la jan shi phew snem. Kumba ka ju long, ka Seng ka kloi ban ȉatreilang bad ka Sorkar, hynrei ka dawa ruh ba ka Sorkar lyngba ka Municipal bad Urban Department ba kin pynbeit shuwa ia ki kynrum kynram bad ki jingkynriang ha ka rukom pyntreikam ia ka aiñ kumba ka paw ha ki rai ba marwei shimet jong ka Municipal bad tnat Urban. Ka Seng kan ym pdiang ia kine ki kam be-aiñ kiba buh jingeh ia ki nongdie madan bad kan ym shah ba ki bor Sorkar kin khǹoit beiǹ ia ki nongdie madan bad ȉuhroit ia ki hok jong ki. Ka Seng kan ym shah ruh ba ki bor Sorkar kin pyndonkam bakla ia ka aiñ.

Ka MGSPHSVA ka pynkynmaw ruh ia ka PTVC, ka Municipal bad tnat Urban ba ka Seng ka la phah ia ki shithi bad ki jingai jingmut halor kumno ban pyndonkam bad pynitynnat ia ki jaka shong die jingdie jong ki nongdie madan. Ka MGSPHSVA ka la pynkhreh ruh ban buh hakhmat ka PTVC ia ka dur ka dar jong ki jaka shong die jingdie kiba khuid, kiba kylluid bad kiba itynnat.

Ka seng ka la mynjur ruh ban kynriah sha ki jaka kiba biang bad ia kane yn lah ban leh hadien ka jingiakren, ka jingȉapynbeit bad jingȉaralang ha ka PTVC. Ha kajuh ka por pat ka Sorkar lyngba ka tnat Municipal bad tnat Urban ki dei ban pynbeit shuwa ia ki jingduna bad ki kynrum kynram kumba ka Seng ka la kdew ha ki shithi bad jingujor jong ka.

Shuh shuh ka Seng ka dawa ba dei ban don ka jingȉapyrkhat bad jingȉashim bynta lang da baroh ha kaba thaw ia ki jaka die jingdie jong ki nongdie madan. Bad ka long ruh kaba kongsan ban shim nongmuna na kwiei ki Sorbah kum na Delhi, Sikkim, Bangalore bad kiwei de ki jaka khnang ban lah ban shna ia ki jaka die jingdie kiba khuid, kiba kylluid, kiba itynnat bad kiba iaid iew. Kane ka jingpyrkhat lang kan wanrah ruh ka jingmyntoi bad jingbha ym tang ia ki nongdie madan, hynrei ia baroh ki nongshong shnong. Ka Seng ka khot ia ki nongshong shnong, ki nongput nongtem, ki architect, ki barikor, ki nongdro bad kiwei ban ia ai jingmut lem.