Ngim kwah ba kan jia kum ha Manipur lada ngi duh noh iaka jaka haka Meghalaya ong u nongialam ka KSA

Syllad | The Rising MeghalayaAugust 17, 2023

U president ka Karbi Students Association (KSA) Mirjeng Kro ula ong ba kim kwah ba kan jia kumba jia ha Manipur, lada ki paid Karbi kin duh noh iaka jaka bad ka jaka jong ki kan leit sha Meghalaya.

Ia kane ula ong hadien ka jingialang Regional Committee jong ka Assam Meghalaya ha Khanduli haka sngi Balang.

U Mirjeng ula ong shai “Lada ngi duh iaka jaka jong ngi haka Meghalaya, ka lah ban wanrah iaka jingjia kum ha Manipur.” Ula kren shai ba ki ieng haka nongrim ba u pud u sam ka Karbi Anglong u dei ban long katkum ba la kdew haka notification 1951 bad kam don nongrim balei ba ki jaka jong ki kin leit sha Meghalaya.

U Welcome Teron, uwei na ki riew rangbah ka Karbi na Umpanai, ula ong ba ka jingthmu ban pynphai biang iaka Block I sha ka Jaintia Hills mynshuwa bad mynta ka West Jaintia Hills ka dei kaba bakla.

Ula kynthoh ruh iaka sorkar Meghalaya haduh mynta kam pat kdew ia u pud u sam ba thikna jong ka bad kala kam iaka Block I & Block II baka hap ha Meghalaya. Ula ong ruh katkum ka notification 1951 ka Khanduli ruh ka hap ha Assam.

Shuh shuh wat la kam don kano kano ka jingpynbna paibah ha kaba iadei bad ka jingpynkynriah iaka Entry Tax Gate ne ka khydrop khrong khajna ka Karbi Anglong Autonomous District Council (KAAC) kaba buh la saw bnai mynshwa ha Khanduli, hyrnei ia kane ka khyrdop la weng noh haka sngi Balang.

Ia kane la ong da Deputy Chief Minister ka Jylla bad Chairman Regional Committee, West Jaintia Hills District (WJHD) Sniawbhalang Dhar bad Myntri sorkar ka Assam bad Chairman Regional Committee West Karbi Anglong District (WKAD) Pijush Hazarika.

Ka Regional Committee West Jaintia Hills District bad West Karbi Anglong District kala hiar sha Khanduli ban pynlong jingialang bad ki nongialam shnong bda dkhot ka Dorbar Shnong Khanduli ha madan ialehkai ka Khanduli hadien bad bad ki paid Karbi ha Police Border Outpost ka Assam, ha Khanduli.

Ha ka meeting kaba nyngkong ka Dorbar Shnong Khanduli, u Chairman, and Regional Committee WJHD bad Chairman Regional Committee WKAD kila ioh iaka dorkhat bad ha kaba kila buh lai tylli ki mat,

Kaba nyngkong ka dei ban weng shuw aiaka Entry Tax Gate ka KAAC mardor, kaba ar ban weng iaki police Assam haka jaka ba buh iaka khyrdop bad ka khatduh kalong ban ban weng iaka Assam Police Camp ha Khanduli

Hadien bala kut ka jingialang, ki nongialam ka bad dkhot ka Regional Committee kila hiar dalade sha ka Entry Tax Gate ka KAAC ha Khanduli lane ka Am-ih kaba la tip ha Assam bad la kam ba kam don shuh ka kane ka khyrdop khrong khajna ka KAAC, katba ki pulit Assam katkum ka jingkam ka bor pyniaid district ka West Karbi Angklong ba la buh iaki pulit ha kane ka jaka ban pahara naka bynta ban pynneh iaka shongsuk shongsain

Ka regional committee kala bteng shhh shuh iaka jingjurip haduh ha Zero Point ha Khanduli kaba shim ba u dei u pud jong ka West Jaintia Hills District.

Hadien ka jingjurip ia kine ki ar tylli ki jaka ki Regional Committee kila pynlong iaka jingialang bad ki nongmihkhmat na ki jaidbynriew Karbi bad ki nongialam ki sengbhalang Karbi Students Association (KSA), Socheng Amreng Border Development Committee, Karbi Anglong Autonomous Council (KAAC) bad kiwei kiwei

U ma Sniawbhalang Dhar ula ong ba iaka Entry Tax Gate kaba don ha katei ka jaka la weng, katba ki pulit Assam ki dang don ban ai ka jingpahara. Ula ong ruh ba ka committee kala wan hiar jurip ia ka Khanduli ban pynthikna ban wanrah iaka jingsngewkhem ki nongshong shnong ha khappud ban wanrah iaka jingshong suk shongsain ha kane ka thain khappud.

Ula ong ruh ba baroh ar tylli ki Regional Committee kin pynsngew sha ki Chief Minister jong baroh ar tylli ki jylla ia kaei kaba ki lap ki shem ha kane ka jingjurip.

U Pijush Hazarika ruh ula ong ba la weng iaka khyrdop lum khajna ka KAAC. Ula ong ba kane ka khyrdop kam lah ban lum khajna na ki nongshong shnong ka Jylla, hyrnei haka jingsngew jong u ka KAAC ka lah ban lum khajna na ki nongshong shnong ka Karbi Anglong bad ula kren shai ruh ba ki pulit ka Assam ki donbor ban lum khajna.

Ula ong “Ngan pynsngew ia kane ha u Myntri Rangbah ha kaba iadei bad ka jingialang bad ki dorkhat bala iohpdiang ha baroh ar tylli ki jingialang.”

Ha kane ka jingialang nalor ki nongialam ka Regional committee, na kaliang ka Assam  la donlang u Rupsing Teron, MLA 20 Baithalangso, Headsing Rongphar, MAC KAAC, D.Uphing Maslai, EM KAAC, Avijit Kro, MAC KAAC, Krishna Baruah, DC West Karbi Anglong. Katba na Meghalaya nalor u ma Sniawbhalang la iadonlang u Coming Ymbon Myntri Sorkar, Nujorki Sungoh Government Chief Whip CEM JHADC ma Thombor Shiwat bad DC West Jaintia Hills Bah BS Sohliya, SP WJH C Syrti  bad kiwei kiwei.