Ngi leh na ka bynta ka jingmyntoi ki nongdie madan, ym ba banbein: Dy CM

Syllad | The Rising MeghalayaJuly 3, 2025

U Symbud Myntri Rangbah ka Jylla uba khmih ia ka Tnad Home (Police), u Bah Prestone Tynsong haka sngi Balang, u la ban jur ba ka rai jong ka sorkar ban pynkynriah ia ki nongdie madan na ka Khyndailad ka thmu na ka bynta ka jingmyntoi ka jong ki, bad ym bad banbein ia ki.

Katkum ka jingong jong u Bah Prestine, ka jingshim ia kane ka sienjam ban pynkynriah ia ki nongdie madan ka dei na ka bynta ka bha ka miat ka jong ki, bad na ka liang ka sorkar ka la ai ruh ka jingkyrshan ia ki ha kaba iadei bad kane ka jingpynkynriah sha ka jaka kiba la dep ban pynkhreh kyrpang.

Haba kren sha ki lad pathai khubor, une u Myntri u la pynpaw ruh ba kine ki nongdie madan kin ioh pdiang ia ka jingkyrshan pisa kaba mar T.10,000 nalor T.2000 shi bnai na ka bynta san bnai kynthih hadien ba la pynkynriah noh ia ki.

U la pynpaw ruh ka jingkyndit ba ki don katto katne ki nongdie madan kiba thaw jingeh wat hapdeng ka jingpyrshang jong ka sorkar ban aijingkyrshan na ka bynta jong ki.

Nalor kata u Symbud Myntri Rangbah u pynshai ruhba ka Town Vending Committee kaba kynthup ia ki nongmihkhmat na ki nongdie madan ka la trei halor ka jingpynkhreh na ka bynta ka jingpynkynriah da kaba pynlong ruh ia buntylli ki jingialang ban pyndep ia kane ka kam.

Ha kajuh ka por u kyrpad ia ki nongdie madan ba kin ai ka jingiatreilang bad ka Committee bad ban rah ia ki mat jong ki sha ka miej na ka bynta ban iakren ia pynbeit.        

Ha kaba iadei bad ki jingiakhih ba dang shen da ki nongdie madan, u Bah Prestone u la kyntu ia ki ba kin ai ka jingiatreilang bad ka Committee da kaba pynthikna ban shimkhia ia ki jingeh jong ki.