Ngat u nongkhaii drok na Ladrymbai ha kti ki pulit traffic ka Madanrting

Syllad | The Rising MeghalayaMay 27, 2025

Uwei u nongkhaii drok uba dei na Lad Rymbai, East Jaintia Hills haka sngi Nyngkong u la shah kem noh ha ki pulit traffic ka Madanrting Police Station kiba la ioh ban kurup noh ia u drok uba khia 1.95 gram.

U Superintendent of Police ka East Khasi Hills, u Bah Vivek Syiem u pyntip ba ha ka por kumba 4 baje, ki pulit Traffic ka Madanrting katba ki dang pynlong ka jingtalasi ia ki kali ar shaka ha Saw Lad, ki la pynieng ia kawei ka scooty kaba don ia u nombor ML 05 Y 7653 namar u nongniah um shym la phong helmet.

Hynrei, ha kaba kum kane ka por une u nongniah u la pyrshang ban phet krad da kaba bret noh ia kawei ka song plastik na ka pla jaket kaba u phong, hynrei u la shah bat noh ha ki pulit. Hadien ba la peit ia katei ka plastik la lap pynban haduh 109 tylli ki bilor rit ba la thep ia u drok heroin.

Hadien kane la pyntip noh sha ki dkhot ka ANTF kiba la wan ban pynlong ia ka jingtohkit hadien ba ki la shem ba u dem u drok heroin uba don ia ka jingkhia kaba 1.95 gram.

Une u briew uba la shah kem u dei uba la tip kyrteng kum u Nimu Chyrmang uba dei na ka shnong Lad Rymbai.

Hadien kane la register case pyrshah ia u ha Madanrting Police Station hapoh ki kyndon 21(a)/27(a) jong ka NDPS Act.