Ngat u nongkhaii drok ha ka shrip ki pulit ka EJH, ioh kurup haduh 274 gram u heroin ba shongdor 1 klur tam

Syllad | The Rising MeghalayaOctober 29, 2023

Ki Pulit ka East Jaintia Hills, hynne ka sngi U Blei, kila ioh ban kem noh ia uwei u nongkhaii droks ha kaba ki la ioh ruh ban kurup noh ia u drok heroin uba don haduh 274.23 gram ba shongdor ha iew T.1.5 klur.

U Superintendent of Police ka District u Jagpal Singh Dhanoa u la ong ba la ioh ban kem noh ia une u briew napoh kawei ka bus Night Super kaba don ia u nombor AS01-FC-7788, bad ia une u briew la tip kyrteng kum u Rofique Uddin Ahmed.

Na ka liang une u heh pulit  u la ong ruh ba ba ki pulit kila ioh ia ka jingtip kaba bniah ha kaba iadei bad ka jingwan poi jong une u briew ha ryngkat u drok, bad kumta mar mar kila pynlong ka jingpynap shrip ha surok bah NH-06 hajan Khliehriat Police Station.

Shuh shuh u heh pulit u pyntip ba hadien ka jingtalasi ia kane ka bus ha ka jingiadonlang ki nongsakhi shimet na ka liang ki pulit kila ioh ban kurup haduh 20 synduk u power rong stem na ka pla jong u, bad hadien ka jingleh ia ka test la lap ba u dei u heroin uba don ka jingkhia kaba 274.23 gram.

Halor kane na ka liang ki pulit ki la register case pyrshah ia une u briew hapoh Khliehriat Police Station ha ki kyndon ka NDPS Act.