Ngat 3 ngut ki nongkhaii drok kynthup u snar nongkhaii ba radbah na Shillong

Syllad | The Rising MeghalayaJune 25, 2025

Ki pulit ka Anti-Narcotics Task Force (ANTF) haka sngi Balang ki la ioh ban kem ia lai ngut ki nongkhaii drok kynthup ia uwei u snar nongkhaii drok ha sor Shillong ha kaba la ioh ban kurup noh ia shibun bah u drok heroin.

Kine ki laingut kiba la shah kem noh ki dei kiba la tip kyrteng kum u Rohit Mattu, u Ansh Sher Gill ba ju khot sin u Suraj Gill bad u Raman Raina.

U SP ka ANTF u Jagpal Singh Dhanoa u la ong hadien ba ki la ioh ia ka jingtip kaba bniah ki dkhot ka kynhun mardor ki la pynlong ia ka jingkhynra ha kaba ki la ioh ban kem noh ia u Rohit Mattu na ki bynta jong ka Cantonment.

Ha kane ka jingkhynra ba la ialam da u SI Pradeep Das bad ki dkhot ka ANTF PS ha ka jingiadon lang ki sakhi ba laitluid ki pulit ki la ioh ban kurup noh haduh 10.26-gram u drok heroin na u Rohit Mattu.

Haba bteng ia ka jingtohkit la shem ba u Rohit Mattu u dei uba trei na ka bynta u Suraj Gill uba dei u snar nongkhaii drok ba hakhmat eh hapoh ka thain Cantonment bad ki jaka ba marjan.

Hadien ka ANTF ka la ioh ban kem noh ia u Suraj bad ha ka jingtohkit u la phla ba u la pyndonkam bakla ia ka dukan hardware jong u ha Cantonment na ka bynta ban leh ia kine ki kam beain.

Haba bteng ia ka jingtohkit ka ANTF ka la ioh ban kem sa ia u Raman Raina uba la phla ba u Gill u la wai ia kawei ka iing ha Raid Laban ha ka kyrteng jong u bad u Rohi Honda ka jaka ha kaba ki la buhrieh ia une u drok.

Haba pynlong ka jingtalasi ha kane ka iing la ioh ban kurup noh ia u drok heroin uba don ka jingkhia kaba haduh 152 gram.

U SP ka ANTF u pyntip ba mynta ki dang pynlong ka jingthwet kaba jur ban ioh kem sa ia u Rohit Honda uba la don hapdeng ka jingphet rieh.