Nga shakri ia u paidbah ym ia ki lehnoh; ong u Dy.CM Sniawbhalang Dhar

Syllad | The Rising MeghalayaMay 11, 2025

U Symbud Myntri Rangbah ka Jylla uba khmih ia ka Tnad Urban Affairs, u Bah Sniawbhalang Dhar hynne ka sngi U Blei u la kyntait war ia ka jingkynnoh ba dang shen jong ka seng kieng atiar Hynniewtrep National Liberation Council (HNLC) ba u donkti ha kaba synniang pisa sha kane ka seng ha ka por ba u dang bat kum u Myntri ha ka sorkar ba la leit ba la ialam da ka Congress da kaba ong ka dei tang ka kam iasylla sain pyrthei ban pynjah burom ia u.

“Ka long kaba sngewsih ba ngam shym la don ha la ka jylla ha kine ki khyndiat taiew ba la dep. Ka jingkynnoh jong ka HNLC ka long ka bym shisha bad ka bym don nongrim hangno hangno ruh. Kumjuh na ki rukom kren jong kiwei ki nongialam sain pyrthei, la iohi ba kane ka dei pynban ka kam iasylla sain pyrthei tang ban pynjah burom ia ka kyrteng jong nga,” ong u Dhar haba kren sha ki lad pathai khubor.

“Sngewbha kynmaw katba ki nang kwah ban pynsaphriang ia ki khubor sniew pyrshah ia nga, U Blei un kyrkhu ia nga, ia ka party jong nga bad ia ka sorkar namar nga don hangne ban shakri ia ki briew jong nga da kaba shisha. Ngi don hangne ban iada ia u paidbah, ia ka jylla bad ia ka ri baroh kawei. Ngi dei ki nongialam jong phi, sngewbha shaniah ha ngi namar baroh kine ki dei ki jingkynnoh ki bym don nongrim,” u la bynrap.

Halor ka jingdawa jong ka liang pyrshah Congress bad ka VPP ban pynhiar shuki ia u khnang ban plie lynti na ka bynta ban pynlong ia ka jingtohkit halor kane ka jingkynnoh, u Dhar u la ong ba um long uba kloi ban iehnoh kam kum u Symbud Myntri Rangbah namar ba ka jingkynnoh jong katei ka seng kieng atiar ba la khein beain ka dei ka bym don nongrim satia.

“Kane ka dei ka jingdawa na ka liang pyrshah. Ka dei ka kamram jong ki, hynrei ban dawa iehnoh kam bad hiar shuki, kane baroh ka donkam ia ki sakhi satar kiba biang ban pynshisha. Lada nga iehnoh kam kata ka mut ba nga pdiang ia ka jingkynnoh ia kaba ngan ym mynjur da lei lei ruh, bad ngam khuslai ei ei namar nga don hangne ban shakri ia u paidbash ym ia ki lehnoh, sngewbha kynmaw ia kata. Kane ka dei ka jingkular jong nga. Haduh 17 snem nga la long kum u MLA ha la ka jong ka jylla. Nga ieit ia la ki jong ki briew. Nga pynshisha ban trei shitom shuh shuh na ka bynta ka bha ka miat jong ki nongshong shnong ka jylla.Ka jingkynnoh baroh ka long ka bym don nongrim,” u la bynrap.

Haba kylli la un shim ia kano kano ka sienjam ban mudui ejahar halor kane ka jingkynnoh, u Symbud Myntri Rangbah u la ong, “Ngan sa peit namar tang da kaba pyrkhat ngam tip mano ba don bynta sha lyndet hynrei lehse lada nga lap mano ba donkti sha lyndet lehse ngan hap ban leh ia kata.”

“Ngin sa ia peit kaei ka ban leh. Phi tip ka dei ka seng kaba la shah khein beain. Phi tip teng teng la pynphriang ia ki jingialap thok man ka por. Ngin hap ban peit bniah la kadei ka mat kaba khia ne em, ngin sa ia peit, hynrei ka dei ka jingkynnoh ka bym don nongrim bad kaba bakla baroh,” u la ong.

Shuh shuh u Bah Sniawbhalang u la pynpaw biang da kaba ong ka dei ka kam iasylla sain pyrthei, “Ka rukom jingkren ka wan na ki party sain pyrthei. Kiba bun ki briew ki kwah ban pynphriang ia ki khubor sniew pyrshah ia nga shimet, hynrei ngam khuslai namar ka kamram jong nga ka long ban trei na ka bynta ki paidbah ka jylla bad ka roi ka par sha ka kyrdan kaba kham shalor.Kata ka dei ka jingthmu jong nga bad kata ka dei ka jingthmu jong ngi kum ka sorkar ruh.”