Nga rung sha ka jylli ka saiñ hima ban shna aiñ ym ban shong khop ha Dorbar: Lakhon Biam

Syllad | The Rising MeghalayaFebruary 2, 2019

JOWAI: U Ma Lakhon Biam, u engineer uba la ïehnoh ïa kam bad uba shah rem haka elekshon MLA 2018 ula ong “Nga la rung sha jylli ka saiñ hima sima ba ngan ïoh shna aiñ bad ban shakri uba duk ba rangli namar ba bun ki jingmyntoi ba ki paidah ki dei ban ïoh ym shym la pynpoi hok sha u paidbah”.

“Ka kam nongmihkhmat ka dei ka kam kaba khia bad u nongmihkhmat u dei ban long u briew uba ïohi jngai bad ban don ka mission kumjuh ban ïasaid ïaka ïap ka im u paidbah, hynrei kumba jia long u nongmihkhmat ba phi la jied na kane ka thain u shong khop hapoh ka ïing dorbar ka JHADC la 15 snem kynthih”, la ong u Ma Lakhon Biam u kyrtong ka United Democratic Party (UDP) na Nongbah haba kren haka jingïalang ban pan jingkyrshan jong u paidbah haka sngi Thohdieng.

Une u kyrtong ka UDP un aireng para marwei pyrshah ïa u kyrtong ka National People’s Party (NPP) u Ma Shemhok Garod uba long u MDC ba mynta.

Haba kren shuh shuh u ma Lakhon ula ong ba ula rai ban ïakhun elekshon MDC hadien ka jingïasyllok bad ki riew rangbah ka thaiñ bad ki nongkyrshan ba radbah ka party UDP. La pdiang burom ïa u ma Lakhon ha u Nohprah 18 bad la jied ruh ïa u ban long u President ka UDP Raliang LA Constituency.

“Lada phi jied ïa nga, ngan ïasaid naka bynta jong phi bad ban thaw ïaki aiñ kiban ïada ïaka riti ka dustur bad ka jaidbynriew katkum bala pynkup bor haka sixth schedule”, la ong u ma Lakhon bad kynthoh ïaka jingai trading license pathar ka JHADC ïa u bar jylla wat ha ki kam ba u trai ri u lah ban trei.

Ha kane ka sngi la jied ruh ïaki nongkitkam ka UDP ha 7 Nongbah MDC Constituency. U President u Eborlang Dhar, Vice President Conboyry Hinge, Secretary Comfort Thubru, Assistant Secretary Lakhon Phawa, Treasurer Phaimi Biam And 26 Executive Members. Haka Women Wing la jied President ïaka Tipsngi Songwai, Vice President Loyal Sungoh, Secretary Momtis Thubru, Treasurer Jukimon Hinge bad 24 Members. Iaka jingïalang la pynïaid da u ma Raplang Lamare.