Nang jur ka jingpyrshah lynti rel ha East Jaintia Hills, hadien ka JSU, KSU, HYC sa ka FKJGP

Syllad | The Rising MeghalayaJuly 12, 2023

Ka jingpyrshah iaka jingwanrah lynti rel kala nangjur ha rilum Jaintia Hills ha kaba ki sengbhalang (pressure group) kila mih kawei hadien kawei ban phah jingthoh sha u Chief Minister Conrad K Sangma.

Ka KSU ka ieng skhem haka nongrim jong ba da lei lei kam nym ailad ban wanrah iaka lynti rel ha Jylla. Ka dei kawei na ki seng ba pyrshah jur iaka jingthmu wanrah lynti rel naduh u snem 1988 bad haduh mynta ka ieng haka nongrim tad haduh baka sorkar kan thaw iaki aiñ ban khanglad iaka jingwan rung kyrthep ki mynder ne ki bar jylla.

Haka sngi ba ar, ka KSU kala ai da ka dorkhat sha u Chief Executive member JHADC ban kyntu ba kam dei ban ai NOC ban tei lynti rel ha Rilum Jaintia ban iada iaka jaidbynriew kaba shitroh. Ia kane ka dorkhat ka KSU kala ai ha u Dy CEM Lasky Rymbai haka jingialam u president ka KSU West Jaintia Hills District u Laitphar Synkrem bad u General secretary KSU East Jaintia Hills District u KS Suchiang.

U KS Suchiang ula ong ba la pyrshah ban wanrah iaka lynti rel ha Byrnihat bad ka mut aiu ban khyllie biang ia kane ka mat ban wanrah lynti rel ha Rilum Jaintia. Ula ong ba kumba ngi pyrshah haki snem ba la leit ki ieng skhem haka nongrim ban pyrshah iaka lynti rel tad haduh ba don ki ain ban iada iaka jingwan rung kyrthep ki bar jylla.

Ka FKJGP East Jaintia Hills pat kala ai dorkhat lyngba u DC sha u Chief Minister bad kala ong ba ka jingwan ka lynti kan buh jingma iaka jaidbynriew rit bad kan shah tyllep ha u poiei lada ym don ki ain ba pyrkhing.

“Ban iada iaki jingma ki bym lah ban poi pyrkhat, ka jingpyntreikam iaka Inner Line Permit ka donkam ha baroh kawei ka jylla,” la ong ka FKJGP haka dorkhat sha u CM bad dawa ruh ban kyntiew kyrdan iaka surok bah NH 6.

Kane ka surok kadei kaba kongsan pynban la shu iehshrah khlem maramot bad kane ka jingleh ka sorkar kadei kabym lah ban pdiang.

Nalor kine ki ar seng, ka JSU, HYC, JSM bad kiwei kiwei marsien pynbna u Myntri Rangbah Conrad K Sangma ba la pynlong iaka jingwad bniah ban wanrah iaka rel ha East Jaintia Hills kila pynher iaka jingthoh ban pyrshah jur ia kane ka jingthmu.