Nang itynnad ka lympung ialehkai Meghalaya Youth League 2024 katba nang iaid ki sngi

Syllad | The Rising MeghalayaSeptember 8, 2024

Ka lympung ialehkai phutbol Meghalaya Youth League 2024 ba la khot pynlong da ka Meghalaya Football Association (MFA) ha ryngkat ka jingkyrshan lang da ka Sorkar Meghalaya ka la nangkham itynnad bad nangkhluit katba nang iaid ki sngi hadien ba la lah ban sakhi biang ia ki jingialehkai ha ka ka 7 tarik Nailur.

Ka jingialehkai ha ka Zone B ha ka kyrdan U-14 ka West Jaintia District Sports Association bad ka Amlarem Block Sports Association ki la ioh ia ka jingjop ha la ki jong ki jingiakhun da 4-0 bad 6-0 pyrshah ia ka Laskein Block Sports Association bad ka Saipung.

Hynrei haba phai sha ka kyrdan U-16 ka Saipung ka la pynliem noh ia ka Amlarem da 3-1 ban poi ha ka kyrdan kaba ar hapoh ka group. Katba ka West Jaintia ka la ioh ia baroh ki artylli ki jingjop da kaba pynliem ruh ia ka Laskein da 7-1.

Ha ka Zone C, ka Sohra Sports Association ka la ioh ia ka jingjop ha ka jingiakhun kaba nyngkong jong ka league da 2-1 pyrshah ia ka Riwar Mihngi Football Association ha ka kyrdan U-14 division. Dei tang kane ka jingialehkai ha kane ka kyrdan jong ka Zone C ba la pynlong ha katei ka sngi kut taiew.

Ka Riwar Mihngi watla ka la ioh ia ka jingjop ha ka U-16 da 3-1 ha ka jingiakhun hapdeng ki artylli ki team kaba dei ruh ka sien jop ba nongkong jong ka bad kaba la pynlong ba ki ban ioh kham heh point haba ia nujor bad ka Western Ri-Bhoi Sports Association. Hynrei ka Western Ri Bhoi ka la shah rem noh ha ka kynhun jong ka Ri-Bhoi District Sports Association da 2-0.

Ha ka Zone D ka jingiakhun kaba mar ia aireng hapdeng ka Nongstoin District Sports Association bad Pyndengumiong District Sports Association ha ka kyrdan U-14 ka la kylla biang ha katei ka sngi. Ka Nongstoin ka la lah ban pynliem noh ia ka Pyndengumiong da 2-1 ban knieh biang ha ka kyrdan kaba nyngkong jong ka lympung ialehkai, katba ka Mawkyrwat District Sports Association ka la pynliem noh ia ka Eastern Border Sports Association da 1-0. Katba ka jingiakhun hapdeng ka Tyrsad Area Sports Association bad ka Mawshynrut ka la kut ha ka jingiakhaid da 0-0. 

Ka jingiakhun ha ka kyrdan U-16 hapdeng kitei ki team la sakhi ia ka Mawshynrut kaba wan nadien ban pynliem noh ia ka Tyrsad Area da -3-2. Ka Eastern Border bad ka Mawkyrwat ki la ia don bynta sa ha kawei pat ka jingiakhun kaba thep bun kol, ha kaba ka EBSA ka la lah ban pynliem noh da 5-3. Ha ka U-16 jong ki khynnah shynrang ka Pyndengumiong ka la iakhaid bad ka Nongstoin da 2-2 kol bad kiba dang bat ha ka kyrdan kaba halor eh hapoh ka zone, hynrei ka jingiaid shakhmat jong ki ka la shah khate noh lyngba ka jingjop jong ka Eastern Border. Mynta ka Mawshynrut ka la kiew da ar kyrdan sha ka kyrdan kaba lai da jingjop pyrshah ia ka Tyrsad Area.

Kam shym la don satia kano kano ka jingialehkai ha ka Zone A hadien ba la lah ban pyndep noh ha kane ka taiew ba la dep.

U-14 result na ka byna ka 7 tarik Nailur

Zone B – Laskein Block Sports Association 0 – 4 West Jaintia District Sports Association

Zone B – Saipung Block Sports Association 0 – 6 Amlarem Block Sports Association

Zone C – Riwar Mihngi Football Association 1 – 2 Sohra Sports Association

Zone D – Nongstoin District Sports Association 2 – 1 Pyndengumiong District Sports Association

Zone D – Mawkyrwat District Sports Association 1 – 0 Eastern Border Sport Association

Zone D – Tyrsad Area Sports Association 0 – 0 Mawshynrut Sports Association

U-16 result na ka bynta ka 7 tarik Nailur

Zone B – Laskein Block Sports Association 1 – 7 West Jaintia District Sports Association

Zone B – Saipung Block Sports Association 3 – 1 Amlarem Block Sports Association

Zone C – Riwar Mihngi Football Association 3 – 1 Sohra Sports Association

Zone C – Western Ri-Bhoi Sports Association 0 – 2 Ri-Bhoi District Sports Association

Zone D – Nongstoin District Sports Association 2 – 2 Pyndengumiong District Sports Association

Zone D – Mawkyrwat District Sports Association 3 – 5 Eastern Border Sport Association

Zone D – Tyrsad Area Sports Association 2 – 3 Mawshynrut Sports Association