Namar ka jingrhah pynjulor ki 3 ngut ia ki sakhi satar ba don jingiadei bad ka jingshah pyniap u Raja: SP

Syllad | The Rising MeghalayaJune 25, 2025

U Superintendent of Police (SP) ka East Khasi Hills, u Bah Vivek Syiem haka 24 tarik Jylliew ula pyntip ba ia ki lai ngut ki briew kiba la shah kem noh namar ka jingpynjulor ia ki sakhi satar ba kongsan kiba don jingiadei bad ka jingjia shah pyniap u Raja Raghuvanshi ha Sohra yn wanlam noh sha Shillong ha ka 26 tarik Jylliew ban pynlong shuh shuh ia ka jingtohkit kaba bniah.

U Lokendra Singh Tomar uba shong ba sah ha Gwalior, Madhya Pradesh uba dei ruh u trai jong kawei ka iing (flat) ha Dewas Naka ka jaka kaba ka Sonam Raghuvanshi kaba la shah suba donkti hakhmat eh halor ka jingjia shah pyniap ka shongrieh ha Indore u la shah kem noh ha ka 23 tarik Jylliew na Gwalior namar ka jingpynduh pyndam bad buhrieh ia ki sakhi satar kiba kongsan.

Ha ka 22 tarik Jylliew, ki pulit ki la ioh ban kem noh ia u Silome James uba dei u nongdie iing bad jaka uba la ai wai ia ka flat sha u Vishal Singh Chauhan uwei na ki suba donkti hakhmat eh halor katei ka kam pyniap bad ia u Balia Ahirwar uba dei u nongap pahara ha ka jaka ba don katei ka flat namar ka jingpynduh bad pynjulor noh ia ki sakhi satar.

“Ngi la pan da ka transit remand kaba hynniew sngi. Baroh kine kiba shah kynnoh donkti yn wanrah sha Shillong bad yn ialam tian bishar ia ki hapoh ka iingkashari ha ka 26 tarik Jylliew,” ong u Bah Vivek Syiem haba kren sha ki lad pathai khubor.

U SP u la ong ba ka jingleit sah jong ka Sonam ha katei ka flat ha Gwalior ka la paw pyrthei tad hadien ba la pynlong ia ka jingtohkit da ka Special Investigation Team (SIT). Hynrei, haba ka kynhun ki pulit ka la hiar shakatei ka jaka ha ka 10 tarik Jylliew ka la lap ba kane ka jaka ka la thylli.

U SP u la ong ruh ba ki pulit ki la don ia ki sakhi satar halor ka jingdon bynta jong kine ki lai ngut ki briew kiba la shah kem halor ka jingpynjulor ia ki sakhi satar kiba kongsan kiba iadei bad katei ka jingjia kam pyniap.

“Ngi don ia ki sakhi ban pynshisha ba kine ki briew ki la sei shabar ia ka synduk ha kaba la thep ia ka ksiar jong ka Sonam bad u kynjri jong u Raja,” u la bynrap.

Haba kylli, u SP u la ong, “Ha ka jingshisha kine ki lai ngut kim donkti ha ka kam pyniap, hynrei ki dei kiba donkti pat ha kaba pynduh ia ki sakhi satar kiba kongsan,” bad bynrap “Lehse ka daw kaba kongsan nga lah ban ong ka dei ka jingrhah. Kine ki briew ki la rhah haba ka suba donkti ka la shah kem noh, ki lah ban pyrkhat ban peit don aiu hapoh ka synduk, ka lah ban don ka pisa bad kiwei khlem da tip ba ki pulit kin sa lapdien. Hadien haba sngewthuh ba ki briew kin wan ba ba ki lah ban sa lap, kumta kine ki laingut kila leh ia katei ka kam kaba long beain,”

“Ngi la shim ia ki lyngkhot ba sah na ka jaka ba la thang ia ki tiar ki tar na katei ka jaka. Ka kynhun Forensic na Madhya Pradesh ka la wan bad ngi la phah ia ki sha ka Forensic bad ngin sa sngewthuh ki dei kiei. Lehse ka lah ban dei ka phone, bad ym iohi dak ha kaba iadei bad kino kino ki jingdeng ksiar,” ong une u heh pulit.

Nalor kane u SP ula phla ba ki pulit kila pynthikna ba ka Sonam bad uba ieid u jong ka u Raj Singh Kushwaha kila don ia ka jingiadei bad kila don ruh ia la ki jong ki kompeni jong ki bad ki angnud ban pyniar ia ka kam khaii pateng ka jong ki.

“Kine ki dei kiba la buh jingmut na ka bynta ban pynjah noh ia u Raja namar ba ki kwah ban pyniar ia ka khaii pateng bad ki dei ruh kiba don ia ka jingiadei. Kam don kano kano kaba palat ia kane kaba la mih” ula ong bad ka bynrap “Ngi la dep ban tih bniah ia kane ka jingjia bad ka dei ka kamram ka jong ngi ban pynkhlain ia ki sakhi satar bad dei na kane ka daw ba kam dei tang na ka jingphla ia ka jingkubur hynrei kadei ka jingpynkhlain ia ki sakhi satar pyrshah ia ka jingkren ka jong ki”.

U SP ula pynpaw ruh ia ka jingskhem jingmut ba ki pulit kin lah ban Chargesheet noh kham kloi.

Halor ka jingdawa ban leh ia ka Narco Test, u Bah Vivek ula ong, ba ym iohi eiei ban donkam ban leh ia kane ka Test kumba ka long mynta hi.

“Ban leh ia ka Narco Test ka dei kaba la khang pyrshah da ka Supreme Court. Ia ka jingleh ia ka Narco Test yn ym pdiang satia hapoh ka iingkashari. Ka shu ai tang ia ki symboh jingmut ne ki dak ki shin. Haba kila dep ban kubur ba kila leh ia kam bymman ngi la dep leh ia ka jingpynwandur biang ia ka kam pyntriem, ngi lah dep rekod ia ki sakhi satar ha ka jaka kaba la jia. Ngam iohi pat balei ngin dang donkam ban leh ia ka Narco Test ha kane ka khyllipmat kaba mynta” u la bynrap shuh shuh.