Na Shella ioh bat ka HYC ia u nong Bangladesh ba pynrung tuh palat 50 ngut ki briew sha India

Syllad | The Rising MeghalayaJune 9, 2025

Ki dkhot ka Seng Hynniewtrep Youth Council (HYC) Jatap bad Shella Area Unit haka 8 tarik Jylliew ki la ioh ban bat noh ia uwei u nong Bangladesh uba wan rungtuh lyngba ki jaka khappud sha ka thain Shella, East Khasi Hills ha kaba ki la aiti noh ia u sha ki pulit ban leh ia kaba donkam.

“Une u briew uba kyrteng u Muhammad Hussain u la phla ba u la jan sha India na ka bynta ban iarap ha ki kam pynrung tuh ia ki briew na Bangladesh bad ban leh ia ki kam khaii tuh da ka jingkyrshan jong ki arngut ki briew kiba dei na ka shnong Kalibari ha India ia kiba la tip kyrteng kum u Bono Biswas bad u Subash Baidya,” ong u president ka HYC Jatap unit u Bah Pyndap Shongwan lyngba u kyrwoh.

“U Hussain u la kam ba u ju shim T.1000 na iwei iwei ki nongwan rungtuh hynrei u la ong ba um tip katno ki siew ia kine ki arngut kiwei pat ki nong India. U la ong ruh ba ka bynta ka jong u ka long tang ban iarap tang ban jam sha India lyngba ki jaka khappud ki bym don jingker ha kaba nangne la shimti pat da kitei ki arngut ki nong India sha ka nongbah Shillong bad sha kiwei pat ki bynta jong ka jylla,” ong u nongialam ka seng.

Nalor kata u Bah Pyndap u pyntip ruh ba Hussain u la phla ba u la iarap ia haduh kumba 50 haduh 60 ngut ki nong Bangladesh  ba kin rung beain sha u pud u sam ka India tang ha kine ki khyndiat sngi ba la dep, bad jan man la ka sngi ki don beit kumba 10 ngut ei ei ki nong Bangladesh kiba rungtuh sha u pud u sam ka India tang ha kine ki shi bnai ba la dep.

“Hadien ba ngi pynlong ia ka jingtohkit ngi la aiti noh ia u sha ki pulit ka Shell police station bad kyntu ban pynlong mardor ia ka jingtohkit halor kine ki kam beain bad ban kem ruh ia kine ki arngut ki nongialam lynti na India kiba donkti ha kine ki kam pynrung tuh ia ki nong Bangladesh sha kane ka jylla bad ka ri,” ong u Bah Pyndap da kaba kyntu jur ruh ia ki shipai Border Security Force (BSF) ba kin shim ia ki sienjam na ka bynta ban tehlakam ia ki kam rungtuh bad ki kam khaii tuh ha ki jaka khappud ka India-Bangladesh.