Na ki 29 ngut, 14 ngut ki MDC thymmai kynthup 2 ngut ki kynthei ha JHADC

Syllad | The Rising MeghalayaFebruary 27, 2025

Na ki 29 ngut ki MDC kiba la shah jied thymmai ha kane ka elekshon ba dang shu dep sha ka iing Dorbar Thawain jong Jaintia Hills Autonomous District Council (JHADC), 14 ngut ki dei ki MDC kiba jop haka sien kaba nyngkong eh.

Baroh ki 29 ngut ki MDC la pynbam smai da u Deputy Commissioner jong ka West Jaintia Hills District u A K Singh, IAS haka 27 tarik Rymphang ha iing dorbar ka konsil. Kine ki MDC ki la bam smai ha ka ktien phareng bad ki la shim smai ha ka kyrteng U Blei ban ai ka jingshakri jong ki katkum ka riti treikam jong ka Constitution jong ka Ri India.

Ar ngut ki MDC thymmai ki dei ki kynthei na ka seng VPP, ka Laiawanlam Jinghun Khyriem na Mynso Nongjngi bad ka Deivipaya Tongper na Narpuh, katba ka Kong Violet Lyngdoh MDC na Rymbai Khliehriat, ka dei ka sien kaba ar jong ka kum ka MDC.

Nalor kine ki ar ngut ki kynthei, ki MDC thymmai ki dei u Jamshaphrang Pohtam na War Central, u Nehimaia Lamare na Mukhla Ummulong, u Daeimi Liam na Shiliang Myntang, u Gresentus Susngi na Nangbah Mihmyntdu, bad u Soki Lapasam na Muthlong Sohkymphor. Baroh kine ki dei ki MDC ka VPP.

Ka National People Party (NPP) ka la pynmih lai ngut ki MDC kiba thymmai bad kita ki long u Reformingson Lamare na Nartiang Wahiajer, u Wormanship Shadap na Mowkaiaw bad u Mihnyngkong Sutnga na Shangpung.

Katba ka Congress Party ka la sei ar ngut ki MDC bathymmai bad kita ki long u MDC jong ka Saphai Sahsniang u Rikut Parien bad u MDC jong ka Saipung Nongkhlieh u Lalwilliama Theite.

Shuh shuh ka United Democratic Party (UDP) ka la pynmih arngut ki MDC ba thymmai bad kita ki long u MDC ka War East u Medling M Swer bad u MDC ka Musniang  Rangad u Wailadameshwa Siangshai.

15 ngut pat ki dei ki MDC barim ne kiba la ju long teng, ki don haduh san ngut ki MDC kiba la ju long Chief Executive Member teng bad kita u long u MDC jong ka Modop Umladang u Thombor Shiwat, u MDC jong ka Amwi Khliehtyrchi u Madonbai Rymbai, u MDC jong ka Jowai North u A. Andrew Shullai, u MDC jong ka Sutnga Nongkhlieh u Hambertus Nongtdu bad u MDC jong ka Jowai South u Moonlight Pariat.

Na pdeng kine ki MDC arngut na ki ki dei ki nongialam sengbhalang mynshwa bad kita ki long u MDC jong ka Saphai Sahsniang u Rikut N Parien uba la ju long teng u President jong ka Jaintia Students Union bad u MDC jong ka Shiliang Myntang u Daeimi Liam uba ju long teng u nongialam jong ka Khasi Students Union.