Na ka MHRC dawa tuklar ki nongtrei mon sngewbha ba pynsangeh ia ka MGNREGS ha Laitnongkseh

Syllad | The Rising MeghalayaMay 8, 2025

Arngut ki nongtrei mon sngewbha ki la mudui sha ka Meghalaya Human Rights Commission (MHRC) pyrshah ia ka jingkynnoh pynsangeh ban pyntreikam ia ka skhim Mahatma Gandhi National Rural Employment Guarantee Scheme (MGNREGS) ha ka shnong Laitnongkseh kaba hap hapoh Sohiong C&RD block lah ar snem mynta.

Kine ki arngut ki nongtrei mon sngewbha kiba kynthup ia u Enlang Sawian uba dei ruh u Education Secretary jong ka HYC bad nongiasaid ain lem bad u Purningstar Shabong ki la kynnoh ba u Block Development Officer (BDO) ka Sohiong block u la pulom ban shim ia ki sienjam ba mardor ha kaba iadei bad kane ka phang.

Kine ki arngut ki la ong ba kane ka jingpynsangeh la ong ba ka dei namar ka jingujor jong ki arngut ki briew kiba kynthup ia u Philstar Nongbri bad Devius Lyngdoh lem bad katto katne ki briew ki bym don job card sha ka ophis u BDO pyrshah ia ka jingpyntrei ia ka surok iaid kali na ka surok PWD sha Mawshakad katkum ka work order kaba 8 tarik Nohprah, 2023 bad 23 tarik Iaiong 2024.

Kane ka jingsahteng jong ka skhim MGNREGS scheme ha Laitnongkseh ka la long ka tyllong jong ki jingeh jingjynjar na ka bynta ki nongshong shnong kiba dei ki trai shnong kaba la ktah ruh khamtam ia ka jakpoh jong ki nongshong shnong kiba shaniah ha kane ka skhim na ka bynta ka lad ioh kam ioh jam.

“Ka Dorbar Shnong ka Laitnongkseh bad ka Village Employment Council (VEC) ki la pyrshang la bunsien ban iakren bad u BDO halor kane ka jingpynsangeh ia kane ka skhim. Hynrei na ka liang u BDO um shym la shim ia kino kino ki sienjam ne pynpaw ka jingsngewkhia halor kane ka jingpynsangeh ban pyntrei ia kane ka skhim kaba kongsan hapoh ka shnong naduh kine ki ar snem kiba la dep bad kaba la ktah jur ia ki nongshnong shnong,” ong kine ki arngut.

Katkum ka jingong ka jong ki, kane ka jingpulom ban pyntreikam ia kane ka skhim 100 sngi ka la wanrah ka jingbitar kaba jur hapdeng ki nongshong shnong kiba la pynpaw ruh ia ka jingsngew ba ia ki jingsngewkhia bad ki jingeh ki jong ki ym shym la shimkhia da ki bor ba dei khmih.

Kumta na ka liang kine ki arngut ki la kyntu ia ka MHRC ba kan tuklar lem bad ban pynlong ia ka jingtohkit ia ka daw sha lyndet jong kane ka jingbym leh ei ei jong u BCO bad ban pynmih ia ka jingbthah na ka bynta ban sdang noh mardor ban pyntreikam ia ki kam ka MGNREGS hapoh kane ka shnong.