Na Jowai sha Iooksi: Da ka cycle ialap ka synjuk niah cycle ban ioh iaka koit ka khiah, jinglehkhuid bad kyntiew kam jngohkai

Syllad | The Rising MeghalayaOctober 22, 2023

Ki dkhot ka West Jaintia Adventure and Cycling Association haka sngi Saitjain kila pynlong ka jingshangkai pyngngad daki cycle na Jowai shaduh sha Wah Kupli, Iooksi West Jaintia Hills District ban ialap iaka jingkongsan ka koit ka khiah, ka jinglehkhuid bad ban kyntiew iaka kam jngohkai.

Kane ka jingshangkai pyngngad kaba jngai kumba 53 kilomitre eiei kaba tip kum ka- Kupli River Holiday Ride bad ka matpdeng jong ka kalong Cycle for Health, Tourism and Cleanliness. Ha kane ka prokram la iatreilang ryngkat ruh bad ka Laskein Block Tourism and Promotion Society.

La sdang ia kane ka jingniah cycle na Lad Nartiang bad la kaweh lama da u Waheh Shnong ka Mihmyntdu u ma Abul Phawa.

U President ka West Jaintia Adventure and Cycling Association, u Biangpor Shylla ula iathuh ba ka jingthmu jong kane ka jingshangkai pyngngad ka long ban ioh iaka met kaba koit kaba khiah, ban kyntiew iaka kam jngohkai bad ban wanrah iaka jingkhuid jingsuba.

Haba la poi ha shnong Iooksi, ki dkhot ka West Jaintia Adventure and Cycling Association ki la pynlong ka jingpynkhuid iaki sawdong sawkun ka Iawpynkat haka jingshim bynta lang da u Waheh Shnong u Bah C. Tangliang. La pyni ruh iaka sap niah cycle ha iew Iawpynkat, Iooksi.

Hadien ka jingpynkhuid iew, ki dkhot ka West Jaintia Adventure and Cycling Association ki la hiar sha ki artylli ki jaka shangkai ba paw ka thain Laskein kiba kynthup ka Kupli Holiday Retreat bad ka Himani Resort bad ha Himani Resort la pdiang sngewbha iaki da u Secretary ka Laskein Block Tourism and Promotion Society u ma Golden Dkhar.