Na Gwalior ioh kem ki pulit Meghalaya ia u trai iing ka Sonam ba pynduh pyndam ia ki sakhi satar

Syllad | The Rising MeghalayaJune 23, 2025

Ki pulit ka Meghalaya haka 23 tarik Jylliew ki la ioh ban kem noh ia u Lokendra Singh Tomar uba shong ba sah ha Gwalior, Madhya Pradesh halor ka jingshah kynnoh donkti ha kaba pyrshang ban pynduh pyndam ia ki sakhi satar kiba don jingiadei bad ka jingjia shah pyniap jong u Raja Raghuvanshi.

Ia u Tomar la ioh ban kem noh hadien ka jingkyrpad ka kynhun Special Investigation Team (SIT) ia ki bor pulit ka Gwalior.

U Superintendent of Police ka East Khasi Hills, u Bah Vivek Syiem u iathuh ba u Tomar u dei u trai jong ka iing kaba don ha Dewas Naka ha kaba ka Sonam Raghuvanshi kaba la shah kynnoh donkti hakhmat eh halor katei ka kam pyniap ka la shongrieh katba ka dang don hapoh Indore. U Tomar la kynnoh ba u la mih na Madhya Pradesh ban leit sha Uttarakhand ha ka 16 tarik Jylliew bad hadien u la bteng ia ka jingleit sha Gwalior haka 22 tarik Jylliew.

“Ka SIT ka la phah iaka jingkyrpad ban kem ia u Tomar bad ka kynhun ki pulit mynta ka la don ha ka lynti na Indore ban leit sha Gwalior ban shimti ia u Tomar na ka bynta ban pynlong ia ka jingtohkit,” u la ong da kaba bynrap ba ia u Tomar yn wanrah hakhmat ka iingkashari ha Gwailor na ka bynta ka jingpynkynriah.

Ia u Tomar la thwet namar ka jingdon bynta ha kaba pynduh pyndam bad buhrieh ia ki sakhi satar kiba kongsan kiba iadei bad kane ka jingjia shah pyniap. Ka jingpyrshang borbah jong ka SIT ban lum ia ki sakhi satar bad ban pynngat ia baroh ki nongleh kam bymman sha ka jingbishar jong ka ain ka dang iaid shakhmat.

Ha ka 22 tarik Jylliew u Silome James uba dei u nongkhaii uba la aiwai ia ka iing (flat) ha u Vishal Singh Chauhan uwei na kiba la shah suba donkti hakhmat eh ha katei ka jingjia kam pyniap, bad u Balla Ahirwar uba dei u nongap pahara uba trei hapoh katei ka complex kaba don katei ka flat ki la shah kem noh namar ka jingpyrshang ban pynduh pyndam ia ki sakhi satar.

“Baroh kine ki laingut kiba la shah kynnoh la khmih lynti ban wanlam sha Shillong ha ka 25 tarik Jylliew,” ong u SP.

Da kane ka jingioh kem, ka jingdon jong baroh kiba la shah kem halor kane ka jingjia ka la kiew sha ka phra ngut, kata kynthup ia ka Sonam Raghuvanshi kaba dei ka kurim jong utei u lanot ba shah pyniap kaba la leit pyndem noh ialade hakhmat ki pulit ha Ghazipur district ka Uttar Pradesh ha ka 8 tarik Jylliew.

Ka Sonam bad uba ieid jong ka u Raj Kushwaha lem bad ki laingut ki paralok jong u kiba la thong ban pyniap ia u Raja ki la don mynta ha phatok  hadien ka jingtohkit ba shiphew sngi da ka SIT ban lapdien ia ka kam iasylla bad ia baroh kiba donkti.