Mynta u bnai Nailur yn sdang klas ka Shillong Medical College; tang T.30,000 shi snem ka bai klas

Syllad | The Rising MeghalayaSeptember 3, 2025

Ka Shillong Medical College (SMC) ka la pynkhreh ban sdang noh ia ka jingai jinghikai ha ka taiew ba khatduh jong u bnai Nailur hadien ba ka la ioh ia ka jingbit bad ia ka Letter of Permission (LOP) na ka National Medical Commission (NMC).

Haba pynbna ia kane ha ka 3 tarik Nailur, ka Myntri ka Tnad ka Koit ka Khiah, Dr Ampareen Lyngdoh, ka la ong, “Mynta ka sngi ka dei ka sngi kaba kmen tam ia ka Tnad ka Koit ka Khiah bad ia ka sorkar Meghalaya namar ngi la ioh pdiang ia ka Letter of Permission na ka NMC kaba la kynthup ia ka SMC kum kawei na ki college kaba la ioh ia ka jingmynjur ban sdang noh ia ka jingai jinghikai naduh kane ka samoi pule jong u snem 2025–26 na ka bynta 50 ngut ki samla pule.”

“Mynta ngi dang pynkhreh ban sdang noh ia ka jinghikai. Ngi la pynkhreh ban sdang noh ha ka taiew ba khatduh jong u Nailur. Kane ka dei ka por kaba la buh hapoh ka ri India baroh kawei na ka bynta ki samla kiba la pyndep ia ka NEET. Ngi sngewkmen ruh ban pyntip ba ki samla pule kiba don ka jingangnud bad kiba la pyndep ki lah ban aplai ban ioh pule MBBS katkum ka jingbhah ia ka Meghalaya ha ryngkat bad ka jingiasyllok bad ka SMC,” ka la ong da kaba pyntip ba ka wat kaba ar jong ka jingiasyllok na ka bynta ka seat MBBS kan sdang ha ka 26 tarik Nailur.

Da kane ka jinglong jingman, ka Meghalaya mynta ka la ioh baroh 144 tylli ki seat pule MBBS, kaba kynthup ia 50 ha ka SMC bad 94 tylli kiba la mang ha kiwei pat ki jaka pule kiba don shabar ka jylla, kum ka NEIGRIHMS bad RIIMS.

“Ka jingdon jong baroh ki seat ha ka SMC ka long 50 tylli. Hynrei, ngi dap ruh da ka jingkmen ban pyntip ba ka Meghalaya kan dang bteng ban ioh ia ka bhah na ka sorkar. Ki don 94 tylli ki seat ba la bhah ia ka Meghalaya ha ki jaka pule bapher bapher kum ka NEIGRIHMS, RIIMS, Imphal,” ong ka Kong Ampareen.

Ka Myntri ka pyntip ruh ba na ka liang u Myntri Rangbah ka Jylla u dang iakren bad u Myntri Rangbahduh Narendra Modi na ka bynta ban wan plie ia kane ka Medical College kaba nyngkong eh jong ka jylla.

“Ka jingsiew kaba shi snem ka long T.30,000. Ngi la buh ia ka dor bai klas kaba duna bha, kata T.30,000 shi snem, kata kynthup ia ka bai hostel,” ka la bynrap.

Da kaba ong ba kane kan wanrah ka jingkylla kaba khraw ia ka jylla Meghalaya, ka Myntri ka la ong, “Ki samla pule jong ngi mynta kiba don ka jingangnud ban pule MBBS ki la don ia ka kabu kaba biang bha. Hooid, kaba kham kongsan ia ki samla pule jong ngi ka long ba kin hap ban treikam hapoh ka jylla Meghalaya, kumta kan long ka jingiarap ban weng ia ka jingeh ha kaba iadei bad ka jingduna doktor ha ki jaka sumar jong ka sorkar ha ka jylla.”

Ka Myntri ka la pyntip ba ka SMC ka dei ka ‘brownfield project’ bad kan pyndonkam ia ki hospital kiba la don lypa kum ka Shillong Civil Hospital bad Ganesh Das Hospital kum ki hospital jinghikai, kaba ban weng ia ka jingdonkam ban tei ia ki hospital kiba thymmai.

Ka college ka thmu ruh ban sdang ia ki course pyntbit ha ki snem ki ban wan, kaba plie ia ki lad ki lynti ban kiew ha ka kam na ka bynta ki doktor kiba ai jingshakri na ka bynta ka sorkar.

Ka la ong ruh ba ka wat kaba ar jong ka jingiasyllok na ka bynta ka MBBS seat kan sdang ha ka 26 tarik Nailur 2025. Ka jingiasyllok kan kynthup na ka bynta baroh ki Medical Seat ba la bhah da ka sorkar India na ka bynta ka jylla Meghalaya.

Ka la pynpaw ruh ka jingsngewskhem halor ka jinglah jong ka college ban ai ia ka jinghikai kaba bha tam ha ka liang ka koit ka khiah, da kaba bynrap ba ka lah ban kham shim por pat ban poi sha ki kyrdan kiba hakhmat. Ka SMC ka iengskhem halor ka nongrim ban pynioh ia ki jinghikai kiba bha bad ha ka rukom ai jingsumar ia ki nongpang.

Katba ka SMC ka la pynkhreh ban sdang ia ka jingai jinghikai lyngba kumba mar shiteng ki nonghikai, ka Myntri ka la ong ba ki la don 8 na ki 16 ngut ki Professor kiba donkam, 17 na 20 ngut ki Associate Professor, 21 na ki 23 ngut ki Senior Residents, 12 na ka 15 ngut ki Tutor bad Demonstrators, bad baroh 25 ngut ki Assistant Professor kiba donkam kila don.

Ka Myntri ka la pynpaw halor kane ka jingduna kum ka jingeh ban khring ia ki Professor sha ka jylla kaba pajih kum ka Meghalaya, da kaba ban jur halor ka jingdonkam ban don ia ka jingsiew kaba heh bad ia baroh ki jingdonkam.

“Hynrei mynta ngin pynkhlain na ka bynta ka jingduna kaba dang sah. Na ka bynta ka jylla kum ka Meghalaya ka Shillong kam dei satia ka jaka kaba don shajngai, hynrei ka long kaba eh ban pynbiang ia baroh kitei ki post namar ngi hap ban don ka jingsiew kaba heh bad ka jingpynbiang ia kiba bun ki jingdonkam ia ki professor. Kumta ban wanrah ia ki ka dei ka jingtynjuh kaba khraw, bad halor kane ngi sngewnguh ia ka kynhun ki ophisar bad ka jingtuklar jong u Myntri Rangbah ban pynthikna ba ngi la don ia ki jingdonkam ba kongsan ha kaba iadei bad ki nonghikai ha kane ka bynta kaba nyngkong,” ka la bynrap.

Ka Myntri ka la pynithuh ruh ia ka Dr Nicola Gracyl Lyngdoh Iangrai, ka ENT Surgeon kaba la shemphang bha na ka RIIMS, kum ka Director jong ka Shillong Medical College. Na ka liang ka Dr Iangrai ka la pynpaw ia ka jinglakloi ban sahkri ia ka jylla bad ban noh synniang ban pynlong ia kane ka Medical College kaba jop.