Mynta ka sngi yn ia aireng ka Lajong FC pyrshah ia ka Churchill Brothers

Syllad | The Rising MeghalayaDecember 6, 2023

Ka Shillong Lajong FC kala long kaba pynkhreh ban iakhun pyrshah ia ka ia ka Churchill Brothers haka round kaba 9 jong ka jingialehkai I-League ka ban long mynta ka sngi 6 tarik Nohprah ha madan SSA Stadium, Shillong ha ka por 2 baje nohphai sngi.

Hadien ka jingiakhun kaba jwat kaba lam sha ka jingiakhaid pyrshah ia ka Rajasthan United ha ka jingialehkai kaba dang shu dep shen, ka Lajong ka la don ha ka kyrdan kaba 4 ha ka miej khein point da kaba ioh 13 point na ki hynniew tylli ki jingialehkai.

Na ka liang u head coach ka Shillong Lajong u Bah Bobby L Nongbet haba kren sha ki lad pathai khubor haka sngi ba Ar, u la ong ba ka kynhun jong u ka la long kaba la pynkhreh na ka bynta kane ka jingialehkai pyrshah iaka Churchill Brothers bad kan dei ruh ka jingialehkai kaba itynnad bha namar baroh ki artylli ki kynhun ki dei kiba mar ia biangbor.

Kumjuh na ka liang ka Churchill Brothers hapoh ka jingialam u head coach uba dei na Argentina u Edgardo Malvestiti mynta ka la don ha ka kyrdan kaba 9 ha ka miej khein point lyngba ki artylli ki jingjop, artylli ki jingiakhaid bad 3 ka jingshah rem bad ioh ban khur 8 point na ki hynniew tylli ki jingialehkai.

U Edgardo u la ong ba ka kynhun jong u kan hap ban iakhun tyngeh pyrshah ia ka Lajong hapoh ka ktem ka jong ka ha ryngkat ka jingioh jingkyrshan ba pura na ki paidbah.